Hewlêr (Rûdaw) - ENKSyê bangî hikûmeta Sûriyeyê kir ku bi Şandeya Kurdan re dest bi dan û standinan bike û tekez kir ku ew şande nûnera rewa û tekane ya gelê Kurd e.
Encûmena Niştimanî ya Kurdî ya Sûriyeyê (ENKS) îro civîna xwe ya asayî li bajarê Qamişloyê yê Rojavayê Kurdistanê, li ofîsa Partiya Demokrat a Kurdistan-Sûriyeyê (PDK-S) li dar xist.
Civîn bi amadebûna Serokê ENKSyê Mihemed Îsmaîl, endamên desteya serokatiyê û piraniya endamên encûmenê hat lidarxistin.
Di rojeva civînê de pêşhatên dawî yên li Sûriye û Rojavayê Kurdistanê û her wiha bûyerên dawî yên li parêzgeha Siwêdayê hatin gotûbêjkirin.
#VÎDEO - Encûmena Niştimanî ya Kurdî ya Sûriyeyê (ENKS) bangî hikûmeta Sûriyeyê kir:
— RudawKurdi (@RudawKurdi) August 5, 2025
🎙️ ❝Bi Şandeya Kurdî re dest bi dan û standinan bike❞
🎙️ ❝Em amade ne❞#Rojava #ENKS pic.twitter.com/RFMXooSHdX
“Şandeya Kurdan nûnerê rewa yê tekane ye”
Berdevkê ENKSyê Feysel Yûsif di daxuyaniya ya piştî civînê de ragihand ku civîn di demekê de hat kirin ku li welêt û herêmê pêşhatên siyasî yên bilez diqewimin.
Yûsif tekez kir ku divê Sûriyeya paşerojê welatekî hevbeş be ji bo hemû pêkhateyên xwe yên neteweyî û olî, ji Ereb, Kurd, Durzî, Elewî û yên din.
Feysel Yûsif destnîşan kir ku Şandeya Kurdan a ku ji “Konferansa Yekrêzî û Yekhelwesta Kurdî” ya 26ê Nîsanê derketiye, nûnera rewa û tekane ya gelê Kurd li Sûriyeyê ye û divê birêvebiriya nû ya li Şamê vê yekê li ber çavan bigire.
Di dawiya civînê de, beşdaran li ser pêwîstiya bilezkirina amadehiyên ji bo lidarxistina Kongreya 5emîn a ENKSyê gotûbêj kirin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse