Hewlêr (Rûdaw) - Li Amedê bi boneya 21ê Sibatê Roja Zimanê Dayîkê ya Navneteweyî, li bazara taxê etîket û tabelayên Kurdî hatin belavkirin.
Armanc ew e ku zimanê Kurdî di bazirganiya rojane de zêdetir were bikaranîn.
Rêveberiya Karên Çand û Civakî ya Şaredariya Peyasê, Rêveberiya Parastin û Pêşxistina Ziman a Şaredariya Bajarê Mezin a Amedê û Komeleya Lêkolînên Çand û Zimanên Mezopotamyayê (MED-DER) di çarçoveya çalakiyên 21ê Sibatê Roja Zimanê Dayîkê ya Navneteweyî de xebateke hevpar meşand.
Di çalakiyê de li sûk û bazara taxê etîketên biçûk û tabelayên dikanan ên bi Kurdî li firoşkar û dikandaran hatin belavkirin.
Endamên Meclisa Şaredariya Peyasê, nûnerên Birêvebiriya Çandê, Komîsyona Ziman, Birêvebiriya Parastin û Pêşxistina Ziman a Şaredariya Bajarê Mezin a Amedê û birêvebirên MED-DERê beşdarî çalakiyê bûn.
Hişmendiya zimanî
Armanca sereke ya çalakiyê zêdekirina hişmendiya zimanî ye.
Ji ber vê yekê, etîketên curbicur li firoşkar û welatiyan hatin belavkirin.
Di nav wan de etîketên biha û navên sebzeyan bi Kurdî (Kurmancî û Kirmanckî/Zazakî), her wiha etîketên deriyan ên bi nivîsên “Vekirî – Girtî” û “Bi xêr hatin” jî hebûn û li dikan û kargehan hatin daliqandin.
Xelkê eleqeyeke mezin nîşan da
Şandeyê bi dikandarên bazarê û welatiyan re sohbet kir û guh da daxwaz û pêşniyarên wan.
Di hevdîtinan de hat tekezkirin ku parastina mîrateya çandî û bikaranîna zimanê dayîkê di hemû warên jiyana rojane de, bi taybetî jî di qada bazirganiyê de gelekî girîng e.
Dikandar û welatiyên ku ji bo kirîn û firotinê li bazarê bûn, ji vê çalakiyê gelekî kêfxweş bûn û eleqeyeke mezin nîşan dan.
Gelek kesan got ku ev cure çalakî ji bo zindîkirina zimanê Kurdî di jiyana rojane de gaveke pir biqîmet e.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse