Bafil Talebanî / Wêne: Torên civakî
Hewlêr (Rûdaw) - Serokê Yekîtiya Niştimanî ya Kurdistanê (YNK) di bangeşeya partiya xwe ya li Silêmaniyê de diyar kir ku ew Îraqeke bihêz û yekgirtî dixwazin û anî ziman, "Îraq a me hemûyan e."
Serokê YNKyê Bafil Talebanî ji wan dengderên Îraqî yên ku biryar daye beşdarî dengdanê nebin re got, "Çima hûn nayên dengê xwe nadin YNKyê, YNKyê ti caran êş û kul nedane Îraqiyan."
Hilbijartinên Parlamentoya Îraqê dê 11ê Çiriya Paşîn werin kirin.
Bafil Talebanî di bangeşeya Yekîtiya Niştimanî ya Kurdistanê de berê xwe da alîgirên partiya xwe û ragihand:
"Mafê we li Bexdayê ye, tiştê ku em dikin dê paşeroja tevahiya Îraqê biguherîne, armanca me jî xizmeta xelkê Kurdistan û Îraqê ye."
Serokê YNKyê armanca sereke ya partiya xwe wekî "xizmetkirin" bi nav kir û da zanîn:
"Tenê armanceke me heye, ew jî xizmet e, divê hikûmet xizmeta xelkê bike."
Talebanî her wiha rexne li nebûna xizmetguzariyan girt û got:
"Derfetên kar nînin, elektrîk ne wekî pêwîst e û wekî pêwîst xizmeta astengdaran nayê kirin."
Bafil Talebanî tekezî li ser bihevrejiyana aştiyane ya li Kerkûkê kir û anî ziman:
"Em li wî bajarî berî Kurdan xizmeta aliyên din dikin."
“Îraq a me hemûyan e”
Serokê YNKyê ducare kir û got:
"Em Îraqeke bihêz û yekgirtî dixwazin, Îraq a me hemûyan e.
Projeyên me yên li dijî gendeliyê û ji bo xizmetguzariyên bingehîn hene, em bi awayekî realîst difikirin."
Bafil Talebanî berê xwe da namzedên partiya xwe û ji alîgiran re ragihand:
"Ev nûnerên Kurdistan û Îraqê ne, karê we ew e ku hûn li Bexdayê xizmeta Kurdistan û Îraqê bikin.
Xizmeta ciwan, jin, kesên astengdar, malbatên şehîdan û girtiyên siyasî bikin."
Talebanî ji namzedên partiya xwe re jî got, "Ez qebûl nakim ku hûn li Bexdayê li dû berjewendiyên xwe bikevin."
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse