Rayedarên payebilindên Başûr û Rojavayê Kurdistanê civiyan

Hewlêr (Rûdaw) - Îro li Hewlêrê hevdîtinek di navbera Berpirsê Dosyaya Sûriyê û Rojavayê Kurdistanê yê li Dîwana Serokatiya Kurdistanê Dr. Hemîd Derbendî û Hevserokê TEV-DEMê Aldar Xelîl de çê bû.

Di vê hevdîtinê de behsa rewşa Rojavayê Kurdistanê û dîtina riyên çareserkirina pirsgirêkên di navbera Encûmena Niştimnaiya Kurdî li Sûriyê (ENKS) û Partiya Yekîtiya Demokratîk (PYD) de hate kirin.

Li gor zanyariyên Rûdawê yên piştraskirî, ew hevdîtin li ser daxwaza TEV-DEMê hatiye kirin.

Yek ji mijarên sereke yên hevdîtinê ew mijar bûye, mijara vekirina ofîsên ENKSê li Rojavayê Kurdistanê bûye, ku di civînê de tekezî li ser hatiye kirin, ku pêwîst e bê gotûbêj û şert û mercan, ji aliyê TEV-DEMê ve were çareserkirin.

Herwiha, azadkirina girtiyên siyasî, rakirina astengiyên li pêşiya xebatên ENKS û serbestkirina çûn û hatina serkirdeyên wê encûmenên di navbera Başûr û Rojavayê Kuridstanê mijarên din ên hevdîtina her du rayedarên payebilind ên Başûr û Rojavayê Kurdistanê de bûne.

Li aliyê din serkirdeyê TEV-DEMê Aldar Xelîl ji Rûdawê re ragihand, ku armanca hevdîtina wî ligel Hemîd Derbendî, nêzîkkirina aliyên Kurdî yên li Rojavayê Kurdistanê ye.

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger