Hewlêr (Rûdaw) - Çavkaniyek ji Polîtburoya Yekîtiya Niştimanî ya Kurdistanê (YNK) ji Rûdawê re ragihand ku Serokê YNKyê Bafil Talebanî û Serok Mesûd Barzanî li Pîrmamê civiyane.
Li gorî heman çavkaniyê, di civînê de behsa rewşa niha ya Herêma Kurdistanê û pêkanîna kabîneya nû ya Hikûmeta Herêma Kurdistanê hatiye kirin.
Li gorî agahiyên Tora Medyayî ya Rûdawê, naveroka civîna Bafil Talebanî û Serok Barzanî ji sê xalan pêk dihat.
Gotûbêjkirina li ser peymana û hinardekirina petrola Herêma Kurdistanê, hilbijartinên Parlamentoya Îraqê yên ku biryar e 11ê Çiriya Paşîn a 2025an werin kirin û her wiha pêkanîna kabîneya nû ya Hikûmeta Herêma Kurdistanê.
Li gorî agahiyên Rûdawê, civîn îro nîvro pêk hatiye û demeke kurt berî niha bi dawî bûye.
Baregeha Barzanî jî li ser civînê daxuyanî da û diyar kir ku di hevdîtinê de rewşa siyasî ya Îraq û herêmê, pêvajoya siyasî ya Herêma Kurdistanê û pêkanîna hikûmeta nû ya Herêma Kurdistanê hatine gotûbêjkirin.
Tê payîn ku Bafil Talebanî ji Balafirgeha Navneteweyî ya Hewlêrê vegere Silêmaniyê.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse