بەهای دراوەکان؛ تمەن ژمارەیەکی نوێی پێوانەیی لە دابەزین تۆمار کرد

رەوەز میرزا، ئاڵوگۆڕکاری دراو لە بازاڕی دۆلارەکەی سلێمانی ئەمڕۆ یەکشەممە، 12-01-2025، بە تۆڕی میدیایی رووداوی گوت: "ئەمڕۆ 100 دۆلار بەرامبەر 8 ملیۆن و 280 هەزار تمەنی ئێرانە".

بەپێی ئەو بازرگانانەی کە لە بازاڕی دراوی تاران، ناسراو بە بازاڕی فێردەوسی مامەڵەی دراوەکان دەکەن، رێگریی یەکێک لە بەندەرەکانی چین لە کەشتییە ئێرانییەکان، بووەتە هۆکار پرسیاری زۆر سەرهەڵبدات کە لەوە بەدواوە و بەتایبەتی لە دوای دەستبەکاربوونی دۆناڵد ترەمپ، سەرۆکی هەڵبژیردراوی ئەمریکا، ئێران تاوەکو چەند دەتوانێت بەردەوام بێت لە فرۆشتنی نەوتی خۆی؟

بەپێی ئەو بازرگانانە، حکومەتی چین بەهۆی نیگەرانی لە سەپاندنی پێناسە گومرکییەکان لەلایەن ئەمریکاوە بە ئەگەری زۆرەوە کڕینی نەوتی ئێران سنووردار دەکات.

شارەزایانی ئابووریش پێیانوایە هەوڵەکانی حکومەتی ئێران بۆ ئەوەی ببێتە ئەندامی رێکخراوی ( FATF) کە رێکخراوێکە لەلایەن وڵاتانی جی حەوتەوە بۆ رووبەڕووبوونەوەی شوشتنەوەی پارە دامەزراوە، بە ئەگەری زۆرەوە دەبێتە هۆکار بۆ ئەوەی دابەزینی بەهای تمەن سنووردار بێت.

ئەندامبوون لە FATF دەبێت لەلایەن پەرلەمانی ئێرانەوە پەسندبکرێت، ئەمەش وا دەکات پرۆسەکە کاتی زۆر بخایەنێت.

100 دۆلار: 151 هەزار دینار

100 دۆلار: 3450 لیرەی تورکی

1,000,000 لیرەی سووری: 184 هەزار دینار

100 یۆرۆر: 154 هەزار دینار

100 پاوەن: 181 هەزار دینار

1,000 کرۆنی سوێدی: 111 هەزار و 500 دینار