رووداو دیجیتاڵ
پارێزەری شۆن "دیدی" کۆمبس، ئەستێرەی دیاری میوزیکی هیپ هۆپ، رایگەیاند، ئەگەر دۆناڵد ترەمپ لە هەڵبژاردنی داهاتووی سەرۆکایەتیدا سەربکەوێت، داواکردنی لێخۆشبوونی سەرۆکایەتی بۆ دیدی یەکێک دەبێت لە "بژاردە کراوەکان".
ئارۆن دایر، پارێزەری دیدی، لە میانی بەشداریکردنی لە پۆدکاستی "PBD Podcast"ـدا ئاشکرای کرد، تیمە یاساییەکەی "هەموو بژاردەکان لەبەرچاو دەگرێت" بۆ بەرگریکردن لە بریکاردەرەکەی، کە رووبەڕووی تۆمەتی قورسی فیدراڵی بووەتەوە، لەوانە بازرگانیکردن بە مرۆڤ بۆ مەبەستی سێکسی.
کاتێک پرسیاری لێکرا ئایا داواکردنی لێخۆشبوون لە ترەمپ یەکێکە لەو بژاردانە، دایر گوتی: "بێگومان، ئەوە یەکێکە لەو شتانەی کە لەسەر مێزەکە دەبێت".
ئەم لێدوانە لە کاتێکدایە کە دیدی، یەکێک لە دیارترین ناوەکانی جیهانی میوزیک و بازرگانی، چاوەڕێی دادگەییکردنەوەیەکی چارەنووسساز دەکات کە بڕیارە لە مانگی ئایاری 2026 بەڕێوەبچێت.
دایر هەروەها باسی لە دەستبەسەرکردنی کاتیی دیدی کرد و بە "سامناک" و "چاوکەرەوە" ناساندی. گوتیشی، ئەو ماوە کورتەی لە گرتووخانەی فیدراڵیدا بەسەری برد، کاریگەریی قووڵی لەسەر دیدی هەبووە.
دیدی کۆمبس هەموو ئەو تۆمەتانەی رەتکردووەتەوە کە خراونەتە پاڵی و جەخت لە بێتاوانیی خۆی دەکاتەوە. ئەم گەشەسەندنە نوێیەش رەهەندێکی سیاسی دەخاتە سەر دۆسییە یاساییە ئاڵۆزەکەی.
