'دڵی شانازیی سەرایێڤۆ' دەبەخشرێتە ویلیام دافۆ

فێستیڤاڵەکە یەکێک لە گەورەترین فێستیڤاڵەکانی فیلمە لە باشووری رۆژهەڵاتی ئەوروپا و بڕیارە لە 15 تا 22ـی ئابی 2025 بەڕێوەبچێت.

دافۆ، لە ماوەی کاروانە هونەرییەکەیدا لە زیاتر لە 150 فیلمدا رۆڵی گێڕاوە، بەهۆی فرەلایەنی و بوێری لە هەڵبژاردنی رۆڵەکانیدا لەسەر ئاستی نێودەوڵەتی ناسراوە.

جۆڤان مارجانۆڤیچ، بەڕێوەبەری فێستیڤاڵی فیلمی سەرایێڤۆ، رایگەیاند: "گەڕانەوەی ویلیام دافۆ بۆ فێستیڤاڵی فیلمی سەرایێڤۆ دوای 25 ساڵ، جێگەی شانازی و خۆشحاڵییەکی گەورەیە بۆ ئێمە کە خەڵاتی دڵی شەرەفی سەرایێڤۆی پێشکەش بکەین".

گوتیشی: "هەر جارێک دێتە بەردەم کامێرا، دەیسەلمێنێت کە مامۆستایەکی راستەقینەی پیشەکەیەتی، جا چ لە فیلمێکی گەورەی هۆڵیوود بێت یان فیلمێکی سەربەخۆی کەم بوودجە، کارەکتەرەکانی بەردەوام ئاڵۆز، پڕ لە هەست و لەبیرنەکراون".

ویلیام دافۆ لە چوارچێوەی فێستیڤاڵەکەدا ماستەرکلاسێکیش پێشکێش دەکات، تێیدا ئەزموونی خۆی لەگەڵ بەهرەمەندە گەنجەکان، پیشەوەرانی فیلم و ئامادەبووانی فێستیڤاڵەکەدا هاوبەش دەکات.

دافۆ لە ماوەی کارکردنیدا چوار جار بۆ خەڵاتی ئۆسکار بەربژێرکراوە، لەوانە بۆ فیلمەکانی "Platoon"، "Shadow of the Vampire"، "The Florida Project" و "At Eternity's gate"، هەروەها خاوەنی چەندین خەڵاتی دیکەی بەناوبانگە وەک جامی ڤۆڵپی فێستیڤاڵی فیلمی ڤێنیس و ورچی زێڕینی شانازیی بەرلین.

یەکەمجار نییە دافۆ سەردانی سەرایێڤۆ دەکات، بەڵکو 25 ساڵ لەمەوبەر بەشداریی لەم فێستیڤاڵەدا کردووە. 

ئەمساڵ جگە لە دافۆ، رێز لە سینەماکاران و ئەکتەرانی دیکەی وەک پاولۆ سۆرێنتینۆ، ستێلان سکاشگارد و رەی وینستۆنیش دەگیرێت.