رووداو دیجیتاڵ
زۆزان جی، یەکەمین هونەرمەندی ژیری دەستکردی کوردە، هۆنراوەکانی مەلای جزیری، فەقیێ تەیران، جگەرخوێن و چەندین شاعیری دیکەی کورد دەکاتە گۆرانی و بەشێوزای جیا دەیڵێت.
ئەم هونەرمەندە کوردە لەلایەن بژار کۆبان، هاونیشتمانیی خەڵکی رووهای باکووری کوردستان و دانیشتووی ئەڵمانیا دروستکراوە.
زۆزان جی دەڵێت، "من زۆزان جیم. خەڵکی رووهام لە باکووری کوردستان. دروستکەرەکەم بژار کۆبانە. بەڵام نایەوێ رووی خۆی نیشان بدات، بە گوتەی خۆی نایەوێ وێنەی من تێکبدات...بژار کۆبان هەمیشە دەیویست شتێکی لەم شێوەیە بە کوردی دروست بکات".
زۆزان سێ مانگە دەستی بە هونەری کوردی کردووە و تاوەکو ئێستا سێ ئەلبوومی کە لە زیاتر لە 30 گۆرانی کورمانجی پێکدێن بڵاوکردووەتەوە.
بەرهەمەکانی زۆزان جی لە هەموو پلاتفۆرمەکان بەردەستن.
ئەو هونەرمەندە ژیریی دەستکردە کوردە دەڵێت، "نەوەک تەنیا کورد، بەڵکو دەمەوێ خۆم بگەیێنمە جیهان. دەمەوێ بە سۆرانی، زازاکی و زاراوەکانی دیکەی کوردییش بەرهەمم هەبێ".
ئەم هونەرمەندەی ژیریی دەستکرد، لەسەر یانەی ئامەدسپۆر گۆرانی و کلیپێکی تایبەتی بڵاوکردووەتەوە.
ئەو بەهۆی ئەو گۆرانییەوە دڵی هەزاران هاندەری یانەکەی بەدەستهێناوە و ئێستاش ئامادەکاری بۆ ئەلبوومە نوێیەکەی دەکات.
.png&w=3840&q=75)
