شانۆگەرییەک لە لەندەن چیرۆکی کۆڕەوی کورد و دروستبوونی ناوچەی ئارام دەگێڕێتەوە

شانۆگەرییەکە لە لایەن کریس باوەرز، رۆژنامەڤان و دیپلۆماتی پێشووی بەریتانی لە هەرێمی کوردستان نووسراوە و باس لە رووداوەکانی بەهاری 1991 دەکات. ئەو کاتەی رژێمی بەعس بە دڕندانە راپەڕینی گەلی کوردی سەرکوت کرد و بەهۆیەوە نزیکەی دوو ملیۆن کورد ماڵیان جێهێشت و لە دۆخێکی مرۆیی مەترسیداردا بوون.

شانۆگەرییەکە بە سپۆنسەری میدیایی تۆڕی میدیایی رووداو نمایش دەکرێت.

چیرۆکی شانۆگەرییەکە تەنیا باس لە ئازارەکانی ئاوارەیی و دەربەدەربوون ناکات، بەڵکو دەچێتە ناو جەرگەی بڕیاردان لە لەندەن. (سەیف هەیڤن) تیشک دەخاتە سەر خەباتی دوو دیپلۆماتی بەریتانی کە بە هاوکاریی پەنابەرێکی کورد، لەناو دامەزراوەی (وایت هۆڵ) کە ناوەندی بڕیاری سیاسیی بەریتانیایە هەوڵ دەدەن حکومەت رازی بکەن بۆ دەستوەردانی مرۆیی و راگەیاندنی ناوچەی ئارام.

کریس باوەرز، نووسەری شانۆگەرییەکە خۆی ئەزموونی کارکردنی لە هەرێمی کوردستان هەبووە، ململانێی نێوان "ئەرکی ئەخلاقی" و "سیاسەتی واقیعی" لە قاڵبێکی دراماییدا نیشان دەدات کە چۆن بڕیارە دیپلۆماسییەکان دەتوانن ژیانی ملیۆنان مرۆڤ لە مردن رزگار بکەن.

نمایشی بەرهەمە شانۆییەکە ئەمڕۆ چوارشەممە 14ـی کانوونی دووەمی 2026 لە شانۆی ئەرکۆلا لە لەندەن دەستپێدەکات و تاوەکو 7ـی شوبات بەردەوام دەبێت. ماوەی شانۆگەرییەکە یەک کاژێر و 45 خولەک.

لە شانۆگەرییەکەدا بێس بورۆوس بە رۆڵی کارەکتەری (کاتەرین)، مەزڵووم گوڵ (دلاوەر عەلائەدین)، ئۆجینی بوودا (نەجات)، ریچارد لینسۆن (کلایڤ)، لیسا زەهرا (ئان) و ستیڤن کاڤانا (برێت) رۆڵ دەگێڕن.

تایبەتمەندییەکی دیکەی نمایشەکە ئەوەیە کە لە چەند شەوێکی دیاریکراودا، دوای تەواوبوونی شانۆکە، گفتوگۆی کراوە لەنێوان بینەران و پسپۆڕانی سیاسی و ئەو کەسانە رێک دەخرێت کە لە ژیانی راستەقینەدا بەشدار بوون لە ئۆپەراسیۆنی (سەیف هەیڤن) لە 1991، ئەمەش دەرفەتێکە بۆ تێگەیشتنی قووڵتر لەو وەرچەرخانە مێژووییە.

شانۆگەرییەکە تەنیا گێڕانەوەی مێژوو نییە، بەڵکو پەیامێکی مرۆییە لەبارەی ویژدان و بەرپرسیارێتی کۆمەڵگەی نێودەوڵەتی بەرامبەر بە گەلان لە کاتی قەیرانە گەورەکاندا.