.webp&w=3840&q=75)
رووداو دیجیتاڵ
هەفتەى داهاتوو زیاتر لە 49 ملیار دیناری شایستەی دارایی گەنمی پاری جووتیارانی کەرکووک بەگوێرەی خشتەیەک دابەش دەکرێت.
هەینی 21ی ئابی 2026، حەسەن حەمدی، بەڕێوەبەری سایلۆی کەرکووک بە تۆڕی میدیایی رووداوی رایگەیاند: "هەفتەی داهاتوو زیاتر لە 49 ملیار و 280 ملیۆن دیناری شایستەی دارایی گەنمی جووتیارانی پارى کەرکووک دەگات و دەست بە دابەشکردنی دەکرێت".
ئەو بڕە پارەیە بەشێکە لە شایستەی دارایی ئەو 503 هەزار تۆن گەنمەی کە پار لە جووتیارانی کەرکووک وەرگیراوە و هێشتا بەشێکیان ئەو شایستەیەیان وەرنەگرتووە.
حەسەن حەمدی گوتى: "رۆژی یەکشەممە 23ی ئاب سی دی تایبەت بە دابەشکردنی ئەو شایستە داراییانەمان پێدەگات و بەگوێرەی خشتەیەک دابەشی دەکەین، پێشبینی دەکەین لە ماوەی سێ ڕۆژدا پارەکە دابەش بکرێت".
پار تۆنێک گەنمی ناو پلان بە 850 هەزار دینار لە لایەن وەزارەتی بازرگانیی عێراقەوە وەردەگیرا، بەڵام بەهۆى کێشەى کەمى نەختینە تەواوى شایستەى جووتیارانى عێراق نەدرا.
بەڕێوەبەری سایلۆی کەرکووک رایگەیاند، 20%ـی شایستەی دارایی پاری گەنمی جووتیارانی کەرکووک نەدراوە، کە زیاتر لە 200 ملیار دینارە.
ئەم ساڵ بڕی ئەو گەنمەی لە جووتیارانی کەرکووک لە دەرەوە و ناوەوەی پلان وەرگیراوە، گەیشتووەتە نزیکەی 500 هەزار تۆن، کە نرخی تونێکی ناو پلان 700 هەزار و دەرەوەی پلان بە 500 هەزار دینارە.
