رووداو - هەولێر
سەرچاوەیەک لە وەزارەتی دارایی و ئابووریی هەرێمی کوردستان دەڵێ، کار بۆ کۆکردنەوەی پارە دەکرێ بە مەبەستی دابەشکردنی مووچەی مامۆستایانی گرێبەست.
ئەمڕۆ سێشەممە، 25ـی ئابی 2026، سەرچاوەیەک لە وەزارەتی دارایی و ئابووری بە تۆڕی میدیایی رووداوی راگەیاند: "خەریکی کۆکردنەوەی پارەین لە پارێزگاکانی هەرێمی کوردستان، تاوەکو بتوانین مووچەی مامۆستایانی گرێبەست دابەش بکەین".
چاوەڕوان دەکرا ئەم هەفتەیە مووچەی ئەو توێژە دابەشبکرێ. سەرچاوەکەی رووداو گوتی:"تاوەکو ئێستا بڕی پارەی پێویست کۆنەکراوەتەوە، چونکە لە هەندێک شوێن کێشەی نەبوونی پارەی نەختینە هەیە."
سەبارەت بە کاتی دابەشکردنی مووچەکە، سەرچاوەکەی وەزارەتی دارایی گوتی: "ئەگەر پارەکە بە تەواوی کۆبکەینەوە، ئەوا کۆتایی ئەم هەفتەیە دەست بە دابەشکردنی دەکرێ، ئەگەرنا دەکەوێتە هەفتەی داهاتوو."
ئەم بڕیارەی وەزارەتی دارایی لە کاتێکدایە، رۆژی 17ی ئابی 2026، مووچەی مانگی تەممووزی فەرمانبەرانی هەرێمی کوردستان لەلایەن بەغداوە خەرجکرا. دواتر لە رۆژی 18ی ئابی 2026، پرۆسەی دابەشکردنی مووچە لە هەرێمی کوردستان دەستیپێکرد و سێ رۆژی خایاند.
