نرخی زێڕ بۆ نزیکەی 4400 دۆلار دابەزی و بازاڕ چاوەڕوانی بڵابوونەوەی ئامارێکی گرنگە

رووداو دیجیتاڵ

نرخی زێڕ کەمێک دابەزی، ئەوەش دوای ئەوەی ئامارە بەهێزەکانی کەرتی هەلی کار لە ئەمریکا پێشبینییەکانی بۆ بەرزکردنەوەی سوودی بانکی زیاتر کرد. هاوکات وەبەرهێنەران چاوەڕێی بڵاوبوونەوەی ئامارە گرنگەکانی هەڵاوسانی ئەمریکان کە بڕیارە لە کۆتایی ئەم هەفتەیەدا بڵاوبکرێنەوە، بۆ ئەوەی ئاراستەی سیاسەتی نەختینەیی بانکی ناوەندیی ئەو وڵاتە روونتر بێتەوە.

نرخی هەر ئۆنسەیەک زێڕ لەدوای کردنەوەی بازاڕەکانی ئاسیا، بە رێژەی 0.5% دابەزی و گەیشتە 4,405 دۆلار. رۆژی هەینی نرخی زێڕ  بە رێژەی 1% دابەزیبوو.

هەروەها نرخی زێڕ لە گرێبەستەکانی داهاتوودا بۆ رادەستکردن لە مانگی کانوونی یەکەمدا، بە رێژەی 0.5% دابەزی و هەر ئۆنسەیەکی بە 4,452 دۆلار مامەڵەی پێوەکرا.

ئامارەکانی رۆژی هەینی دەریانخست گەشەی هەلی کار لە ئەمریکا لە مانگی ئابدا بە شێوەیەکی بەرچاو خێرا بووە، لە کاتێکدا رێژەی بێکاری لە 4.1%دا جێگیر بووە. ئەمەش ئاماژەیە بۆ باشتربوونی بازاڕی کار، بەوەش ئەگەری بەرزکردنەوەی سوودی بانکی لەم مانگەدا بە کراوەیی مایەوە.

بڕیارە رۆژی پێنجشەممە ئامارەکانی پێنوێنیی نرخی بەرهەمهێنەران (PPI) و رۆژی هەینیش ئامارەکانی پێنوێنیی نرخی بەکاربەر (CPI) لە ئەمریکا بڵاوبنەوە.

تیم واتێرەر، شرۆڤەکاری بازاڕە داراییەکان لە کۆمپانیای (KCM Trade) لەو بارەیەوە رایگەیاند، "ئامارەکانی هەلی کار سوپرایزێکی ئەرێنی بوون و گوشاریان خستە سەر زێڕ، بەڵام هێشتا بە تەواوی یەکلایی نەبووەتەوە کە لە مانگی ئەیلوولدا سوودی بانکی بەرز دەکرێتەوە. پارچە ونبووەکەی ئەم هاوکێشەیە، ئامارەکانی هەڵاوسانی ئەمریکایە کە ئەم هەفتەیە بڵاودەبنەوە."

واتێرەر ئاماژەی بەوەش کرد، "ئەگەر ئامارەکانی هەڵاوسان بەرز بن، پێشبینییەکان بۆ بەرزکردنەوەی سوودی بانکی لەلایەن بانکی ناوەندییەوە زیاتر دەبن، ئەوەش دەبێتە هۆی بەرزبوونەوەی داهاتی سەر قەواڵە داراییەکانی ئەمریکا و گوشارێکی زۆرتر دەخاتە سەر نرخی زێڕ."

بەگوێرەی ئامرازی (CME FedWatch)، بازرگانان بە رێژەی 58.4% پێشبینی دەکەن لە کۆبوونەوەی 15 و 16ی ئەیلوولدا، بانکی ناوەندیی ئەمریکا سوودی بانکی بەرز بکاتەوە.

هەرچەندە زێڕ وەک پەناگەیەک بۆ پاراستنی دارایی لە بەرامبەر هەڵاوسان دەبینرێت، بەڵام بەرزبوونەوەی سوودی بانکی دەبێتە هۆی کەمبوونەوەی سەرنجڕاکێشیی زێڕ، چونکە زێڕ کانزایەکە سوودی لەسەر وەرناگیرێت.

لەلایەکی دیکەوە، دۆناڵد ترەمپ، سەرۆکی ئەمریکا رۆژی هەینی رایگەیاند، ئەگەر بانکی ناوەندی سوودی بانکی دانەبەزێنێت، ئەوا بازرگانی لەگەڵ ئەو وڵاتانە رادەگرێت کە ئەمریکا کورتهێنانی بازرگانیی لەگەڵیاندا هەیە.

سەبارەت بە دۆخی رۆژهەڵاتی نێوەڕاست، ئێران رایگەیاند هەوڵەکانی بۆ رووبەڕووبوونەوەی ئەو کێشانە چڕتر دەکاتەوە کە بەهۆی سزاکانی ئەمریکاوە بۆ سەر ئابوورییەکەی دروستبوون. هاوکات بەرپرسێکی باڵای ئێران هۆشداریی دا لە وەڵامێکی بەئازار ئەگەر وڵاتەکەی رووبەڕووی هێرشی زیاتر ببێتەوە.