رووداو دیجیتاڵ
وەزارەتی دارایی و ئابووریی حکومەتی هەرێمی کوردستان رایگەیاند، رۆژی دووشەممە دەست بە دابەشکردنی مووچەی مانگی ئابی مامۆستایانی گرێبەست و بەشێک لە فەرمانبەران دەکرێت و پرۆسەکە تاوەکو رۆژی پێنجشەممە بەردەوام دەبێت.
بەپێی راگەیێندراوێکی وەزارەتی دارایی کە ئەمڕۆ شەممە (19ی ئەیلوولی 2026) بڵاوکراوەتەوە، رۆژی دووشەممە (21ی ئەیلوول) دەست بە دابەشکردنی مووچەی مانگی ئابی مامۆستایانی گرێبەستی سەر بە هەردوو وەزارەتی پەروەردە و خوێندنی باڵا و توێژینەوەی زانستی دەکرێت و تاوەکو رۆژی پێنجشەممە (24ی ئەیلوول) سەرجەم ئەو مامۆستایانە مووچەکانیان وەردەگرن.
لە بەشێکی دیکەی راگەیێندراوەکەدا هاتووە، هاوکات دەست بە دابەشکردنی مووچەی مانگی ئابی سەرجەم ئەو فەرمانبەرانەش دەکرێت کە لە دوای 1ـی تەممووزی 2024ـەوە بە شێوەی هەمیشەیی و گرێبەست لەسەر میلاکی دامەزراوەکانی حکومەتی هەرێمی کوردستان دامەزراون.
وەزارەتی دارایی روونیشیکردووەتەوە، شایستەی دارایی ئەو فەرمانبەر و مامۆستایانە لەسەر داهاتی ناوخۆی هەرێمی کوردستان خەرج دەکرێت.
