رووداو دیجیتاڵ
ئەمڕۆ پێنجشەممە نرخی زێڕ نزیکەی 20 دۆلار بەرزبووەوە، دوای ئەوەی لە مانگی ئەیلوولدا بە رێژەی 6% دابەزی.
ئەمەش لە کاتێکدایە کە پاشەکشەی هەڵاوسان لە ئەمریکا، پێشبینییەکانی بۆ بەرزکردنەوەی زیاتری رێژەی سوودی بانکی لەلایەن بانکی ناوەندییەوە کەمکردووەتەوە، بەڵام هاوکات بە بەرزی مانەوەی سوودی قەواڵەکانی گەنجینە، زێڕی لە بەردەم مەترسیی فرۆشتنی زیاتردا هێشتووەتەوە.
ئەمڕۆ لە دوای کردنەوەی بازاڕەکانی ئاسیا، نرخی زێڕ بە رێژەی 0.4٪ بەرزبووەوە و هەر ئۆنسەیەکی بە نزیکەی 4170 دۆلار مامەڵەی پێوەکرا.
پێنوێنی خەرجییەکانی بەکاربردنی تاکەکەسی، (PCE)، بەبێ هەژمارکردنی خۆراک و وزە، کە پێوەرە سەرەکی و پەسندکراوەکەی بانکی ناوەندیی ئەمریکایە بۆ پێوانەکردنی هەڵاوسان، لە مانگی ئابدا بە رێژەی 0.2% بەرزبووەوە کە کەمتر بوو لە پێشبینییەکان. هەروەها ئامارەکانی مانگی پێشتریش بۆ خوارەوە پێداچوونەوەیان بۆ کرا، ئەوەش تا رادەیەک بازاڕەکانی لەبارەی ئاسۆی هەڵاوسان دڵنیا کردەوە.
ئەم ئامارانە وایان لە بازرگانان کرد پێشبینییەکانیان بۆ بەرزکردنەوەی رێژەی سوودی بانکی لە کۆبوونەوەی مانگی تشرینی یەکەمی بانکی ناوەندی بە شێوەیەکی بەرچاو کەم بکەنەوە بەجۆرێک ئەگەری بەرزکردنەوەی سوود لە نزیکەی 70%ـی سەرەتای هەفتەوە بۆ نزیکەی 34% دابەزی.
بە بەرزی مانەوەی سوودی قەواڵەکانی گەنجینەی ئەمریکا و مەترسیی بەردەوامیی سیاسەتی توندی نەختی، هێشتا وادەکات زێڕ لەبەردەم مەترسیی شەپۆلێکی نوێی فرۆشتندا بمێنێتەوە.
لە مانگی ئەیلوولدا نرخی زێڕ بە رێژەی 6% دابەزی، کە گەورەترین دابەزینی مانگانەیەتی لە دوای مانگی حوزەیرانەوە؛ ئەمەش دوای ئەوە هات کە بانکی ناوەندیی ئەمریکا بۆ یەکەمجار لە دوای ساڵی 2023ـەوە رێژەی سوودی بەرزکردەوە و ئاماژەی بەوەش کرد کە لەوانەیە تووندکردنەوەی زیاتری سیاسەتی نەختی پێویست بێت.
هەروەها لە ماوەی ئەو مانگەدا، سوودی قەواڵە داراییە جیهانییەکان بەرزبوونەوە، بەو پێیەی نیگەرانییەکان لەبارەی زیادبوونی قەرزەکانی حکومەت و کورتهێنانی دارایی بوونە هۆی زیادبوونی تێچووەکان. بەرزبوونەوەی سوودی قەواڵەکانیش تێچووی دەرفەتی هەڵگرتنی زێڕ زیاد دەکات، چونکە زێڕ هیچ سوودێکی دارایی بەرهەم ناهێنێت.
ئێستاش چاوی بازاڕەکان لەسەر راپۆرتی رۆژی هەینیی هەلی کار و بێکارییە لە ئەمریکا، بۆ وەرگرتنی ئاماژەی زیاتر سەبارەت بە ئاراستەی رێژەی سوودی بانکی ناوەندی و داهاتووی نرخی زێڕ.
