رووداو دیجیتاڵ
دوای ئەو شڵەژانە گەورەیەی کە دوێنێ چوارشەممە بەهۆی گرانکردنی فەرمیی نرخی دۆلار لە بازاڕەکانی دراو دروستبوو، لە دوانیوەڕۆی دوێنێوە بەهای دینار بەرەو جێگیربوون چووە و 100 دۆلار لە دەوروبەری 165 هەزار دیناردا مامەڵەی پێوە دەکرێت.
حاجی سابیر باواجی، سەرۆکی ئەنجوومەنی بازاڕی ئاڵوگۆڕی دراو لە هەولێر، ئەمڕۆ پێنجشەممە 08-10-2026 بە تۆڕی میدیایی رووداوی گوت: "100 دۆلار بە 165 هەزار و 250 دینارە".
هەر ئەمڕۆ لە بازاڕی دۆلارەکەی سلێمانی، 100 دۆلار بە 165 هەزار و 300 دینارە.
بەهای دینار و نرخی دۆلار لە دوای نیوەڕۆی دوێنێوە لە هەمان نرخدا جێگیرە، ئەوەش دوای ئەوەی دوێنێ لەکاتی کردنەوەی بازاڕدا 100 دۆلار گەیشتە زیاتر لە 170 هەزار دینار و شڵەژانی ئابووری دروستکرد.
سەرۆکی ئەنجوومەنی بازاڕی ئاڵوگۆڕی دراو لە هەولێر پێیوایە، بانکی ناوەندیی عێراق وەکو بڕیاری دا دۆلار بخاتە بازاڕەکانەوە بە نرخی فەرمی، لە بازاڕەکانی هەرێمی کوردستان و عێراق نرخی دۆلار لە دەوروبەری ئەو نرخەی ئێستا هەیە جێگیر دەبێت.
چوارشەممە 07-10-2026، بانکی ناوەندیی عێراق و ئەنجوومەنی وەزیرانی عێراق نرخی نوێی دۆلاریان بە دینار دیاری کرد، کە رۆژی پێشتر بڕیاری لەسەر درابوو و لەمەودوا بە شێوەیەک دەبێ، کە 100 دۆلار بە 152 هەزار دینار دەدرێتە بازرگانان و هاووڵاتییان.
پێش ئەو بڕیارە، 100 دۆلار بە نرخی فەرمیی بانکی ناوەندی بە 132 هەزار دینار بوو، لە بازاڕەکاندا بە زیاتر لە 150 هەزار دینار مامەڵەی پێوە دەکرا.
.jpg&w=3840&q=75)