رووداو دیجیتاڵ
بەهای دینار بەرامبەر دۆلار کەمێک بەرزبووەوە و ئێستا 100 دۆلار بە 164,000 دینار مامەڵەی پێوە دەکرێ. گوتەبێژی بازاڕی دراوەکەی هەولێر دەڵێ، هاونیشمانییەکی زۆر دۆلاریان کڕیوە و دەیانەوێ بیفرۆشنەوە.
ئەمڕۆ شەممە 10ی تشرینی یەکەمی 2026 کەیفی خۆشناو، گوتەبێژی بازاڕی دراوی هەولێر بە رووداوی گوت، "بەراورد بە چەند رۆژی رابردوو بەهای دینار بەرزبووەتەوە، بە جۆرێک 100 دۆلار بە 164,400 دینار مامەڵەی پێوە دەکرێ."
سەبارەت بە هۆکاری ئەم دابەزینەی بەهای دۆلار بەرامبەر دینار، کەیفی خۆشناو روونی کردەوە، لە رۆژانی رابردوودا هاونیشتمانییەکی زۆر روویان لە بازاڕ کرد و دۆلاریان کڕی، بەڵام ئێستا کە دۆخەکە جێگیرە، هاونیشتمانییان دۆلارەکانیان دەفرۆشنەوە، ئەمەش وای کردووە خواست لەسەر دۆلار کەم بێت و 100 دۆلار دوو هەزار و 300 دینار دابەزێ.
رۆژی چوارشەممە 7ی تشرینی یەکەمی 2026، ئەنجوومەنی وەزیرانی عێراق بڕیاری دا نرخی فەرمیی فرۆشتنی دۆلار دەستکاری بکات، ئەمەش شڵەژانێکی زۆری لە بازاڕەکانی دراو دروستکرد و بەهای 100 دۆلار لە هەرێمی کوردستان گەیشتە 170 هەزار دینار.
هەر ئەمڕۆ شەممە، سۆکار ئازار، خاوەنی نووسینگەی دراو لە سلێمانی بە رووداوی گوت، "لە دوو رۆژدا بەهای 100 دۆلار سێ هەزار و 200 دینار دابەزیوە و گەیشتووەتە 163،750 هەزار دینار."
سۆکار ئازاد گوتیشی، "ئەو قەرەباڵخییەی چەند رۆژی رابردوو لە بازارەکان دروستبوو، کۆتایی هاتووە. ئێستا هاونیشتمانییان دەزانن بەهای دینار رووی لە بەرزبوونەوەیە، دێن و دۆلارەکانیان دەفرۆشنەوە."
