رووداو دیجیتاڵ
جەی سێلەیت هاووڵاتییەکی ئەمریکییە و 10 ساڵە لە شاری دیترۆیت شوێنی چاککردنەوەی ئۆتۆمبێلی داناوە و پەیوەندییەکی باشی لەگەڵ خەڵک و خاوەن ئۆتۆمبێلەکاندا هەیە. ئەو دەڵێت، شەڕی بازرگانی نرخی خزمەتگوزارییەکانیان بەرزدەکاتەوە.
جەی سێلەیت، باس لەوە دەکات، "خەرجیی هەموو شتێک گەیشتووەتە ئاستێکی بەرز، بە ئەستەم گیرفان بەشی دەکات. بە ڕای من دانانی پێناسی گومرگی نرخی هەموو شتێک بەرزتر دەکاتەوە و لەمە بەدواوە ئەستەمە خەڵک بریار بدەن. بۆ نموونە؛ خواردنی سەر سفرە ئامادە بکەن یان ئۆتۆمبێلەکەیان چاکبکەنەوە؟"
70٪ـی ئەو پارچانەی کە بۆ چاککردنەوەی ئۆتۆمبێل بەکار دەهێنرێت، لە دەرەوەی ئەمریکا هاوردە دەکرێت. سێلەیت دەڵێت: رەنگە لەمە بەدواوە ئەو پارچانە لەنێوخۆی وڵاتەکە بەرهەمبهێنرێن.
ئەمریکا جێبەجێکردنی پێناسی گومرکی 25٪ـی بەسەر کەنەدا بۆ ماوەی مانگێک هەڵپەساردووە لە بەرامبەر بەڵێنی ئەو وڵاتە بۆ تۆکمەکردنی سنوورەکانی.
ئەندرو فێلدهاوس، مامۆستای زانکۆ و ئابووریناسە و دەڵێت، "سەپاندنی پێناسی گومرگی لەسەر هاوردەکردنی هەموو شتێک نرخەکان بەرزدەکاتەوە و کێشەی هەڵاوسان گەورەتر دەکات. بەرزیی نرخەکانیش داهاتی ئەمریکییەکان کەمدەکاتەوە، بە شێوەیەک ناوەندی باج پێشبینیکردووە، هەر ئەمریکییەک دەبێت تێکڕا زیاتر لە 830 دۆلار ساڵانە وەک باج بدات لەبەر پێنەسە گومرگییەکان."
دیترۆیت بەهۆی هەڵکەوتەی جوگرافی و نزیکبوون لە سنووری کەنەداوە، رۆڵێکی گرنگی لە بازرگانی نێوان کەنەدا و ئەمریکا هەیە بە تایبەتی بازرگانیی ئۆتۆمبێل و پارچەی یەدەک، بازرگانییەک کە قەبارەکەی ساڵانەی نزیکەی 800 ملیار دۆلار دەبێت.
