رووداو - تەندروستی
پسپۆڕێکی نەشتەرگەرییەکانی جوانکاری و رێککاری رایدەگەیێنێت، چەوری دەرهێنان جێگرەوەی دابەزاندنی کێش نییە، ئەگەر چارەخواز دوای نەشتەرگەرییەکەش لەسەر شێوازی ناڕێکی ژیانی بەردەوام بێت ئەوا سوودی لێ نابینێت.
د. لاڤین جەوهەر، پسپۆڕی نەشتەرگەرییەکانی جوانکاری و رێککاری بە رووداوی راگەیاند، هەڵبژاردنی پسپۆڕی ناتایبەتمەند و جێبەجێنەکردنی مەرجەکانی پێش نەشتەرگەری و دوای نەشتەرگەری دەکرێت ئەنجامەکانی نەشتەرگەریی دەرهێنانی چەورییەکە نەهێڵن و سەرکەوتوو نەبێت.
بە گوتەی د. لاڤین جەوهەر، چەندین مەرج هەیە بۆ ئەوەی ئەو جۆرە نەشتەرگەرییە بۆ چارەخواز بکرێت، هاوکات ''ئەم جۆرە نەشتەرگەرییە جۆرێکی جوانکارییە و بڕی چەورییەکانی جەستە رێکدەخات {ئەگەر پێویست بێت}''.
دەقی وەڵامەکانی پسپۆڕەکە لەبارەی نەشتەرگەریی دەرهێنانی چەوری؛
رووداو: نەشتەرگەریی دەرهێنانی چەوریی بۆ چ مەبەستێکە؟
چەوری دەرهێنان جێگرەوەی دابەزاندنی کێش نییە، بەڵکو بۆ رێکخستنی جەستەیە، بەتایبەت هەندێکجار کاتێک کەسێک خۆی لاوازدەکاتەوە، هەندێک شوێنی جەستەی هەیە چەورییەکەی دانابەزێت لەو کاتەدا 'دەشێت' نەشتەرگەریی لابردنی چەوری پێویست بێت، یاخود دەکرێت بۆ گواستنەوەی چەوری لە بەشێکی جەستە بۆ بەشێکی دیکەش بێت.
رووداو: لێکەوتەکانی نەشتەرگەریی دەرهێنانی چەوری چین؟
د. لاڤین جەوهەر: دەکرێت ئەمانە بن؛
- شیبوونەوە و ئاوسان لە شوێنی دەرهێنانی چەوری {کاتییە}
- لۆچ و گرێ ئەگەر بە باشی دەرهێنانی چەورییەکە نەکرێت
- کۆبوونەوەی ئاو لە ژێر پێست {دەگمەنە}
- خوێنمەیین {دەگمەن}
رووداو: ئایا کەسێک بیەوێت هەمان کاریگەریی نەشتەرگەریی دەرهێنانی چەوریی دەستبکەوێت و نەشتەرگەرییەکە نەکات، چی بکات؟
د. لاڤین جەوهەر: دەتوانن وەرزش بکەن و خۆراکی تەندروستیش بخۆن، بەڵام هێشتا کاریگەریی نەشتەرگەرییەکەی نییە، چونکە ئەم جۆرە نەشتەرگەرییە جۆرێکی جوانکارییە و بڕی چەورییەکانی جەستە رێکدەخات {ئەگەر پێویست بێت}، ئەگەر پێویستیش نەبێت و کەسەکە لە شێوەی جەستەی خۆی رازیبێت، ئەوا پێویست ناکات.
رووداو: بەهۆی چییەوە کەسێک تووشی کاریگەرییە لاوەکییەکانی نەشتەرگەریی دەرهێنانی چەوری دەبێت؟ هەڵەکە لەکوێدایە؟
د. لاڤین جەوهەر: هەڵبژاردنی پسپۆڕی ناتایبەتمەند بە بوارەکە یاخود ناڕێکیی باری تەندروستیی چارەخوازەکە کە رەچاوی مەرجەکانی پێش نەشتەرگەری بۆ نەکرابێت، یاخود بە رادەیەکی زۆر چەوری لە چەند شوێنێکی جیاوازی جەستەی بە یەکجار دەربهێندرێت، هەروەها پابەندنەبوونی چارەخواز بە مەرجەکانی دوای نەشتەرگەریش.
رووداو: ئایا ئەو نەشتەرگەرییە چ جۆرە سڕکردنێکی بۆ بەکاردێت؟
د. لاڤین جەوهەر: بە گوێرەی دۆخەکە بە سڕکردنی خۆجێیی یاخود سڕکردنی گشتی دەکرێت، بەڵام زۆرجار سڕکردنی گشتییە.
رووداو: دوای ئەنجامدانی نەشتەرگەرییەکە، پێویستە چارەخواز چی بکات و شێوازی ژیانی چۆن بێت؟
د. لاڤین جەوهەر: چارەخواز بە گشتی هەر لە یەکەم هەفتەوە دۆخی جێگیر دەبێت، بەڵام پێویستە ئەمانە بکات؛
- هەفتەیەک بۆ دوو هەفتە پشوو وەربگرێت، چونکە پاشهاتەکانی نەشتەرگەرییەکە کەمتر دەبنەوە.
- لانیکەم شەش هەفتە دوای نەشتەرگەرییەکە کۆرسێ 24 کاژێر بەکاربهێندرێت، پاشان چوار هەفتە رۆژانە نزیکەی 10 کاژێر بەکاریبهێندرێت، چونکە وادەکات بۆشایی لەنێوان پێست و شوێنی دەرهێنانی چەورییەکە دروستنەببێت و رێگری لە ئاوسان و گرێ دەکات.
- مەساجی شوێنەکە بکرێت.
- دوای سێ مانگ لە نەشتەرگەرییەکەی وەرزش و هەمیشەش پارێزی لە خۆراک بکات، چونکە ئەگەر لەسەر ئەمانە بەردەوام نەبێت، ئەوا نەشتەرگەرییەکە کاریگەری نابێت و نەکرێت باشترە.
رووداو: ئایا نەشتەرگەرییەکە بۆ هەموو کەسێک گونجاوە؟
د. لاڤین جەوهەر: هەندێک مەرج هەیە کە پشتی پێدەبەستین وەکو 'پێوانەی بارستەی جەستە BMI دەبێت 30 یاخود کەمتر بێت، ئەوانەی شەکرە و بەرزەپەستانی خوێنیان هەیە پێویستە کۆنتڕۆڵ بێت، راگرتنی دەرمانەکانی شلکردنەوەی خوێن دوای راوێژ بە پسپۆڕی هەناو، دڵنیابوونەوە لە تەندروستیی دڵ و چەند مەرجێکی دیکەش'.
