رووداو دیجیتاڵ واژۆ لە پەرلەمانی عێراق کۆدەکرێتەوە بۆ دانیشتنێکی نائاسایی لەبارەی هێرشەکانی ئەمریکا و سعودیە، داوا دەکرێ عەلی فالح زەیدی وەک فەرماندەی گشتیی هێزە چەکدارەکان؛ فوئاد حوسێن، وەزیرى دەرەوە و عەبدولئەمیر یارەڵڵا، سوپاسالار ئامادە بن. پێنجشەممە 30ی تەممووزی 2026، سروە محەممەد، ئەندامی پەرلەمانی عێراق لە فراکسیۆنی یەکێتیی نیشتمانیی کوردستان بە تۆڕی میدیایی رووداوی راگەیاند: "ژمارەی واژۆی پەرلەمانتاران لەسەر ئەو داوایە گەییشتووەتە 117 پەرلەمانتار". داوای ئەو دانیشتنە نائاساییە بۆ تاوتوێکردنی ئەو هێرشانەیە کە بەرەبەیانی 29ى تەممووز ئەمریکا و سعودیە کردەیانە سەر بارەگای گرووپە چەکدارەکانی سەر بە حەشدی شەعبی لە 6 پارێزگای عێراق و کەرکووک. سروە محەممەد رایگەیاند: "لەو نووسراوەدا داوا کراوە عەلی فالح زەیدی وەک فەرماندەی گشتیی هێزە چەکدارەکان؛ فوئاد حوسێن، وەزیری دەرەوە و عەبدولئەمیر یارەڵڵا، سوپاسالار ئامادەی دانیشتنەکە بن". لەو هێرشانەی ئەمریکا و سعودیەدا 20 چەکداری حەشدی شەعبی کوژران و 32ی دیکەیان بریندار بوون. بەگوێرەی پەیڕەوی ناوخۆی پەرلەمانی عێراق، ئەنجامدانی کۆبوونەوەی نائاسایی پێویستی بە واژۆی 50 پەرلەمانتارە.
عێراق30-07-2026گوتەبێژی حکومەتی عێراق: قەیرانی تەنگەی هورمز بەردەوام بێ، قەرز بۆ دابینکردنی مووچە دەکەین
