رووداو دیجیتاڵ
موسەننا سامەڕایی، سەرۆکی هاوپەیمانیی عەزم، بە شەش ساڵ بەندکردن و زیاد جەنابی، ئەندامی پەرلەمان لە فراکسیۆنی سەروەری، بە پێنج ساڵ بەندکردن لەسەر دۆسیەی گەندەڵی سزادران.
پێنجشەممە 29ی تشرینی یەکەمی 2026، دەستەی دەستپاکیی عێراق رایگەیاند، موسەننا سامەڕایی، سەرۆکی هاوپەیمانیی عەزم بە شەش ساڵ بەندکردن سزادراوە لەگەڵ ناچارکردنی بە گەڕاندنەوەی 30 ملیار دینار.
ئەو تۆمەتانەی کە موسەننا سامەڕایی لەسەری سزادراوە پەیوەندیدارن بە گرێبەستەکانی هەردوو کۆمپانیای پاڵاوگەکانی باکوور و باشوور و نێوەندگیریكردنی لەو گرێبەستانەدا.
موسەننا سامەڕایی، لە هەڵمەتێکی هێزە ئەمنییەکان لە 28ـی حوزەیرانی 2026 بە تۆمەتی گەندەڵی دەستگیرکرا و 19ی ئەم مانگە یەکەم دادبینیی دۆسیەکەی بوو، دۆسیەی گەندەڵی ئەو سەرکردە سوننەیە پەیوەندیدارە بە دۆسیەی عەدنان جومەیلی، بریکاری پێشووی وەزارەتی نەوتی عێراق بۆ کاروباری پاڵاوتن کە لە 30ـی ئایاری ئەم ساڵ دەستگیرکرا.
هەر ئەمڕۆ پێنجشەممە دەستەی دەستپاکی رایگەیاند، زیاد جەنابی، ئەندامی پەرلەمانی عێراق لە فراکسیۆنی سەروەریی سوننەکان بە پێنج ساڵ بەندکردن سزادراوە.
دادگە لە سزادانەکەیدا زیاد جەنابیی ناچار کردووە بە گەڕاندنەوەی چوار ملیار دینار، کە لە رێگەی گرێبەستەکانی کۆمپانیای پاڵاوگەی باکوور دەستی کەوتووە.
