رووداو دیجیتاڵ
وەزارەتی ئاوەدانکردنەوە و نیشتەجێکردن و شارەوانییە گشتییەکانی عێراق رایدەگەیێنێت، مانگی داهاتوو دەرگای پێشکێشکردنی ئەلیکترۆنی بۆ قەرزەکانی سندووقی نیشتەجێبوون دەکرێتەوە و 10 هەزار قەرز بە بڕی تاوەکو 60 ملیۆن دینار دەدرێت. قەرزەکە هەرێمی کوردستان ناگرێتەوە.
نەبیل سەفار، گوتەبێژی وەزارەتی ئاوەدانکردنەوە و نیشتەجێکردن و شارەوانییە گشتییەکانی عێراق،ئەمڕۆ پێنجشەممە (19ی تشرینی دووەمی 2026) بە تۆڕی میدیایی رووداوی رایگەیاند، لەسەر راسپاردەی عەلی فالح زەیدی، سەرۆکوەزیرانی عێراق بۆ دەستپێشخەرییەکانی بانکی ناوەندی بۆ پاڵپشتیکردنی کەرتی نیشتەجێبوون و ئاوەدانکردنەوە، رێباز حەملان، وەزیری ئاوەدانکردنەوە و نیشتەجێکردن وادەی پێشکێشکردنی قەرزی سندووقی نیشتەجێبوونی عێراقی راگەیاند.
نەبیل سەفار ئاماژەی بەوەکرد، پێشکێشکردنی قەرزەکە لە رۆژی یەکشەممە 20ی کانوونی یەکەمی 2026 دەستپێدەکات و تاوەکو رۆژی یەکشەممە 27ی کانوونی یەکەمی 2026 بەردەوام دەبێت. مەرجەکانی پێشکێشکردن ئەوەیە کە تەمەنی پێشکێشکار لەنێوان (18–65) ساڵدا بێت، رووبەری زەوییەکە لە (100)م2 کەمتر نەبێت و دەبێت رووبەری بیناکە لە (65)م2 کەمتر نەبێت.
گوتەبێژی وەزارەتی ئاوەدانکردنەوە ئاماژەی بەوەکرد، هاووڵاتییان دەتوانن بۆ وەرگرتنی قەرزەکە سوود لە ماوەی دیاریکراوی پێشکێشکردن وەربگرن و رێکارەکانی پێشکێشکردن بە شێوەی ئەلیکترۆنی و بەبێ هیچ نێوەندگیرێک لە رێگەی ئەپلیکەیشنی سندووقی نیشتەجێبوونی عێراق تەواو بکەن، کە لەسەر (App Store) و (Google Play) بەردەستە.
بەگوتەی نەبیل سەفار، بڕی (500) ملیار دینار لەلایەن بانکی ناوەندییەوە تەرخانکراوە بۆ پێدانی (10,000) قەرزی نوێ، کە بەپێی رێژەی دانیشتووان و ئاستی هێڵی هەژاری و بە پشتبەستن بە داتا ئامارییەکانی وەزارەتی پلاندانان بەسەر پارێزگاکاندا دابەش دەکرێن. پێشکێشکردن بۆ هەموو پارێزگاکان لە یەک کاتدا و بۆ ماوەی 24 کاژێر لە رۆژێکدا بۆ ماوەی هەفتەیەک بەردەست دەبێت.
سەبارەت بە هەرێمی کوردستان، گوتەبێژی وەزارەتەکە گوتی، قەرزەکە هەرێمی کوردستان ناگرێتەوە.



