رووداو دیجیتاڵ
عەلی زەیدی، سەرۆکوەزیران و فەرماندەی گشتیی هێزە چەکدارەکانی عێراق راسپاردەی تایبەت بە کارکردنی بارەگای کۆنترۆڵ لە جورف سەخر دەردەکات.
نووسینگەی راگەیاندنی سەرۆکی ئەنجوومەنی وەزیران کۆمەڵێک راسپاردەی عەلی زەیدی بڵاوکردەوە و دەڵێت: سەرۆکی ئەنجوومەنی وەزیران، فەرماندەی گشتیی هێزە چەکدارەکان عەلی فالح زەیدی، ئەمڕۆ پێنجشەممە، پاکێجێک راسپاردەی گرنگی تایبەت بە کارکردنی بارەگای کۆنترۆڵ لە ناحیەی جورف نەسر (سەخر) دەرکرد، ئەمەش لە میانەی پێشوازیکردنی لە فەرماندەی بارەگاکە و جێگرەکەی، بە ئامادەبوونی وەزیری ناوخۆ و بەڕێوەبەری نووسینگەی فەرماندەی گشتیی هێزە چەکدارەکان."
راسپاردەکان "پەلەکردن لە کردنەوەی سەرجەم رێگا داخراوەکانی ناحیەی جورف نەسر لەخۆگرت لەگەڵ جەختکردنەوە لەسەر ئەوەی کە سوپای عێراق و هێزە ئەمنییەکانی دیکە شکۆی دەوڵەت بەسەر تەواوی خاکی عێراقدا دەسەپێنن، بەپێی دەستوور و یاسا."
هەروەها جەختی لەسەر کارکردنی حکومەت دەکاتەوە "بۆ پاراستنی گیان و بەرژەوەندییەکانی هاووڵاتیان لە هەر ناوچەیەکی وڵاتدا و رێگریکردن لە هەر حاڵەتێکی زیادەڕۆیی و دەستدرێژیکردنە سەر مافە گشتی و تایبەتەکان، ئاماژەی بەوەش کرد کە هێزە ئەمنییەکانمان وەک یەک جەستە وان و بە هەموو پێکهاتەکانیانەوە کارەکانیان تەواوکەری یەکترن."
ئەوە لەکاتێکدایە، ئەمڕۆ سەعد مەعن، سەرۆکی شانەی راگەیاندنی ئەمنیی عێراق بە رووداوی راگەیاند: "ئەمڕۆ فەرمان بۆ کۆنترۆڵکردنی دۆخی جورف سەخر دەرچوو و سبەی کاژێر 6:00ـی بەیانی جێبەجێ دەکرێت."


