رووداو دیجیتاڵ
دوای دروستبوونی مشتومڕ لەسەر رەنگی جلی فەرمیی قوتابیان لە کەرکووک، بەڕێوەبەری گشتیی پەروەردەی شارەکە رایگەیاند، ئەوانەی ناڕەزاییان هەیە دەتوانن داواکاری پێشکەش بکەن، بۆ ئەوەی بەدەریان بکەن لە بڕیارەکە. بەڕێوەبەری خوێندنی کوردیش لە کەرکووک دەڵێت، ئەوان تەنیا پابەندی بڕیاری وەزارەتی پەروەردەی هەرێمی کوردستان دەبن.
مەنسوور مەزری، بەڕێوەبەری گشتیی پەروەردەی کەرکووک، رۆژی پێنجشەممە 13ـی ئابی 2026، بە رووداوی راگەیاند، بڕیاری یەکپۆشی بۆ هەموو بەشەکانی خوێندن (کوردی، عەرەبی، تورکمانی و سریانی) وەک یەک دەرچووە، بەڵام بۆ چارەسەرکردنی کێشەکە رێگەچارەیەکیان دۆزیوەتەوە.
مەنسوور مەزری گوتی: "هەر قوتابخانەیەک بیەوێت رەنگێکی دیکە بپۆشێت، دەتوانێت داواکارییەک پێشکەش بکات و ئێمەش بەپێی ئەو دەسەڵاتەی هەمانە، لەو بڕیارە بەدەریان دەکەین." ئاماژەی بەوەش کرد، کە خوێندنی کوردی لە رووی کارگێڕی و داراییەوە سەر بە هەولێرە، بەڵام لە رووی تەکنیکی و جلی فەرمییەوە سەر بە بەغدایە.
کامەران عەلی، بەڕێوەبەری بەشی خوێندنی کوردی لە پەروەردەی کەرکووک رایگەیاند، بڕیارەکەی پەروەردەی گشتیی کەرکووک ئەوان ناگرێتەوە. کامەران عەلی گوتی: "دوای پەیوەندییەکانی نێوان هەولێر و بەغدا، روونکردنەوە درا کە ئەو نووسراوە بۆ خوێندنی کوردی نییە. سەرجەم قوتابخانە کوردییەکان ئاگادار دەکەینەوە کە تەنیا پابەندی رێنماییەکانی وەزارەتی پەروەردەی هەرێمی کوردستان بن."
ئەمە لە کاتێکدایە، سامان مەجید، جێگری بەڕێوەبەری پەروەردەی کەرکووک، پێشتر رایگەیاندبوو تاوەکو ئێستا هیچ رێنماییەکی فەرمییان لە بەغداوە پێنەگەیشتووە کە تایبەتمەندی بە خوێندنی کوردی ببەخشێت و دەبێت هەمووان پابەندی رەنگە دیاریکراوەکانی بەغدا بن (کراسی سپی و پانتۆڵی رەساسی یان نیلی).
وەزارەتی پەروەردەی هەرێمی کوردستان بۆ ساڵی نوێی خوێندن رەنگی یەکپۆشی گۆڕیوە (پرتەقاڵی، سوور، شین و رەساسی بەپێی قۆناخەکان)، لە کاتێکدا پەروەردەی گشتیی کەرکووک کە سەر بە حکومەتی فیدراڵییە، جەخت لەسەر رەنگە کۆنەکان دەکاتەوە.
رێگەپێدانەکەی بەڕێوەبەری گشتیی کەرکووک بۆ پێشکەشکردنی "داواکاریی جیاواز"، وەک دەرچەیەک دەبینرێت بۆ ئەوەی قوتابخانە کوردییەکان بتوانن بڕیارەکەی هەرێمی کوردستان جێبەجێ بکەن بێ ئەوەی رووبەڕووی سزای یاسایی ببنەوە.
