رووداو دیجیتاڵ
سەرۆکی هاوپەیمانیی دەوڵەتی یاسا سەرکۆنەی ئەو هێرشە دەکات کرایە سەر نووسینگەی مەسرور بارزانی، سەرۆکوەزیرانی هەرێمی کوردستان و دەڵێ، هەر هێرشێک زیان بە ئاسایشی هەرێمی کوردستان و سەقامگیریی عێراق بگەیێنێت، قبووڵکراو نییە.
ئەمڕۆ سێشەممە 18ی ئابی 2026 نووری مالیکی، سەرۆکی هاوپەیمانیی دەوڵەتی یاسا لە هەژماری فەرمیی خۆی لە تۆڕی کۆمەڵایەتیی ئێکس بڵاویکردەوە، "ئەوەی دوێنێ روویدا لە هێرشکردنە سەر نووسینگەی سەرۆکی حکومەتی هەرێمی کوردستان، بەڕێز مەسرور بارزانی، کارێکی رەتکراوە و سەرکۆنە کراوە."
سەرۆکی هاوپەیمانیی دەوڵەتی یاسا جەختی لەوە کردوەتەوە کە پاراستنی دامەزراوەکان بەشێکە لە ئاسایشی گشتی و گوتی: " هێرشکردنە سەر ئاسایشی هەرێمی کوردستان و سەقامگیریی عێراق و دامەزراوەکانی، کارێکە ناتوانرێت قبووڵ بکرێ."
نووری مالیکی لە پەیامەکەیدا ئاماژەی بەوەش کردووە، ئەم جۆرە کارانە لە لایەن هەر لایەنێکەوە بن رەتکراوەن و داوای کرد لێکۆڵینەوەی ورد لە رووداوەکە بکرێ.
مالیکی دەڵێت:"پێویستە لە رێگەی لێکۆڵینەوە فەرمییەکانەوە وردەکاریی رووداوەکە ئاشکرا بکرێ و ئەنجامدەرانی ئەو کارە بەپێی یاسا سزا بدرێن. دەبێ ئاسایش، سەروەری و یەکپارچەیی عێراق بپارێزێت."
بە گوێرەی دژە تیرۆری کوردستان، بەرەبەیانی رۆژی دووشەممە 17-08-2026، دوو درۆنی بۆمبڕێژکراو کە "لە سنووری ئێرانەوە" ئاراستە کرابوون، نووسینگەی تایبەتی مەسرور بارزانی، سەرۆکوەزیرانی هەرێمی کوردستان و شوێنی حەوانەوەی بەڕێوەبەری ئاژانسی پاراستنیان لە پیرمام لە پارێزگای هەولێر کردە ئامانج.
