رووداو دیجیتاڵ
بەڕێوەبەری خوێندنی کوردی لە کەرکووک رایدەگەیێنێت، سەرجەم ناوەندەکانی خوێندنی کوردی لە کەرکووک پابەندی رەنگەکانی جلی یەکپۆشی وەزارەتی پەروەردەی هەرێمی کوردستان دەبن. دەشڵێت، "لێکتێگەیشتن" لە نێوان هەولێر و بەغدا لەسەر تایبەتمەندیی خوێندنی کوردی لەو شارە دروستبووە.
رۆژی دووشەممە، 24ـی ئابی 2026، کامەران عەلی، بەڕێوەبەری خوێندنی کوردی لە کەرکووک، بە رووداوی راگەیاند: "سەرجەم کارگێڕیی باخچەکانی ساوایان و قوتابخانەکان، پێویستە بە تەواوی پابەندی بڕیاری یەکپۆشی بن، کە لە لایەن وەزارەتی پەروەردەی حکومەتی هەرێمی کوردستانەوە دەرچووە."
سەبارەت بە چارەسەرکردنی ئەو مشتومڕەی لەسەر رەنگی جلی قوتابیان دروست ببوو، کامەران عەلی ئاشکرای کرد، لە ئەنجامی هاوئاهەنگیی نێوان وەزیری پەروەردەی هەرێمی کوردستان و وەزیری پەروەردەی فیدراڵ، گەیشتوونەتە لێکتێگەیشتنێک کە خوێندنی کوردی لە کەرکووک تایبەتمەندیی خۆی هەبێت و هەریەک لە بەڕێوەبەری گشتیی پەروەردەی کەرکووک و بەڕێوەبەری خوێندنی کوردی لەم بڕیارە ئاگادار کراونەتەوە.
رۆژی پێنجشەممە، 13ـی ئابی 2026، مەنسوور مەزری، بەڕێوەبەری گشتیی پەروەردەی کەرکووک، بە رووداوی راگەیاندبوو، کە بڕیاری وەزارەتی پەروەردەی عێراق بۆ یەکپۆشی (کراسی سپی و پانتۆڵی رەساسی یان نیلی) هەموو بەشەکانی خوێندن (کوردی، عەرەبی، تورکمانی و سریانی) وەک یەک دەگرێتەوە، بەڵام لێکتێگەیشتنە نوێیەکە ئەم کێشەیەی چارەسەر کردووە.
