رووداو دیجیتاڵ
مەزڵووم عەبدی لە گوتارێکدا بۆ خەڵکی کوردستان و سووریا، هەڵوەشاندنەوەی هێزەکانی سووریای دیموکرات (هەسەدە) و تێکەڵبوونی بە سوپای سووریا راگەیاند.
مەزڵووم عەبدی لە گوتارەکەیدا کە ئاراستەی سەرۆککۆمار، گەلی سووریا و بنەماڵەی شەهیدانی کرد، ئاماژەی بەوە کرد، سووریا لاپەڕەیەکی نوێ لە مێژووی خۆی هەڵدەداتەوە کە ناونیشانەکەی ئاشتی و سەقامگیرییە.
لە بەشێکی دیکەی قسەکانیدا عەبدی گوتی، "لە کاتی دامەزراندنی هەسەدەوە، شەڕڤانان بەرپرسیارێتییەکی گەورەیان لە یەکێک لە سەختترین قۆناخەکانی مێژووی سووریادا گرتە ئەستۆ؛ سەرەتا شارەکانیان لە دەستی بەعس و دواتر لە تیرۆریستانی داعش رزگار کرد."
مەزڵووم عەبدی جەختی کردەوە، دۆخەکە گۆڕاوە و وڵات چووەتە قۆناخێکی نوێوە. ئەو فەرماندە کوردە ئەوەشی خستەڕوو، "دوای رێککەوتن لەگەڵ سەرۆک ئەحمەد شەرع و تەواوبوونی پڕۆسەی تێکەڵکردنی هێزەکانمان لەنێو لیواکانی سوپای سووریادا، ئەمڕۆ بە بەرپرسیارێتییەکی تەواوەوە هەڵوەشاندنەوەی هەسەدە وەک هێزێکی سەربازیی سەربەخۆ رادەگەیێنین."
سەبارەت بە مافە کولتوورییەکانیش، مەزڵووم عەبدی پرسی زمانی کوردیی بە یەکێک لە دەستکەوتە گرنگەکان ناوبرد و گوتی، "مافی خوێندن بە زمانی کوردی یەکێکە لە مافە هەرە گرنگەکان کە گەلەکەمان چەندین دەیەیە هەوڵی بۆ دەدات." ئاماژەی بەوەش کرد، ئەحمەد شەرع بەڵێنی پاراستنی ئەم مافەی داوە و بڕیارە هەر لەم ساڵدا جێبەجێ بکرێ.
لە کۆتایی گوتارەکەیدا، عەبدی باسی لە دیدگای خۆی بۆ داهاتووی سووریا کرد و رایگەیاند، ئەو سووریایەی دەیانەوێ بونیاتی بنێن، وڵاتی هەموو پێکهاتەکان دەبێت لە عەرەب، کورد، سریانی، ئاشووری، تورکمان و ئەوانی دیکە؛ وڵاتێکی یەکگرتوو و ئارام کە شکۆ و مافی هەموو هاووڵاتییەک دەپارێزێ.
هێزەکانی سووریای دیموکرات (هەسەدە) لە تشرینی یەکەمی ساڵی 2015 وەک هاوپەیمانییەکی سەربازی لەنێوان یەکینەکانی پاراستنی گەل (یەپەگە) و پێکهاتە عەرەب، کریستیان و تورکمانەکان لە حەسەکە دامەزرا و لەو کاتەوە مەزڵووم عەبدی فەرماندەیی دەکرد. ئەم هێزە لە 11 ساڵی تەمەنیدا بووە هاوبەشی سەرەکیی هاوپەیمانیی نێودەوڵەتی لە شەڕی دژی داعش و توانی رۆژئاوای کوردستان و ناوچەیەکی زۆری باکوور و رۆژهەڵاتی سووریا بخاتە ژێر دەسەڵاتی خۆی.
ئەمڕۆ مەزڵووم عەبدی کۆتاییهاتنی ئەرکی هەسەدە و تێکەڵبوونەوەی تەواوەتی بە سوپای سووریا راگەیاند.
دەقی قسەکانی مەڵووم عەبدی:
بەڕێز سەرۆک
ئەی گەلی سووریا.. کوڕان و کچانی نیشتمانەکەمان.. هاوسەنگەرانی رێگای خەبات و بنەماڵەی شەهیدە سەربەرزەکانمان.
ئەمڕۆ لە ساتێکی مێژووییدا لەبەردەمتان وەستاوین کە تێیدا لاپەڕەیەکی گرنگ لە مێژووی سووریا هەڵدەدەینەوە و دەست بە کردنەوەی لاپەڕەیەکی نوێ دەکەین کە ناونیشانەکەی ئاشتی، سەقامگیری و بونیادنانەوەی نیشتمانە.
لەو کاتەوەی هێزەکانی سووریای دیموکرات (هەسەدە) دامەزراون، شەڕڤانانی بەرپرسیارێتییەکی گەورەیان لە یەکێک لە سەختترین قۆناخەکانی مێژووی سووریادا گرتە ئەستۆ. ئەوان زۆرێک لە شار و شارۆچکەکانی سووریایان سەرەتا لە دەسەڵاتی بەعس و پاشانیش لە تیرۆری داعش ڕزگار کرد.
لە ماوەی ئەم جەنگانەدا، شەڕڤانانی کچ و کوڕمان بەنرخترین شتی خۆیان پێشکێش کرد؛ ئەوان گیانی خۆیان فیدا کرد و هەزاران شەهیدمان دا لەپێناو دابینکردنی پاشەڕۆژێکی ئارام بۆ منداڵانی سووریا.
ئەمڕۆ بارودۆخەکە گۆڕاوە و وڵات چووەتە قۆناخێکی نوێوە کە ناونیشانەکەی ئاشتی و بەشداریکردنە لە بونیادنانەوەی سووریای نوێدا. دوای رێککەوتن لەگەڵ سەرۆک (شەرع) و تەواوکردنی پڕۆسەی تێکەڵکردنی هێزەکانمان لەناو لیواکانی سوپای سووریا، ئەمڕۆ کۆتاییهاتنی ئەرکی هێزەکانی سووریای دیموکرات و هەڵوەشاندنەوەی وەک هێزێکی سەربازیی سەربەخۆ رادەگەیێنین.
ئێمە یادی شەهیدانمان لەگەڵ خۆمان هەڵدەگرین و قوربانییەکانیان لە ناخماندا دەپارێزین، چونکە ئەوان لەپێناو جەنگدا شەڕیان نەکرد، بەڵکو بۆ ئەوە جەنگان تاوەکو رۆژێک بێت سوورییەکان چیتر پێویستیان بە شەڕ نەبێت. دەمانەوێت ئەم رۆژە ببێتە سەرەتای گواستنەوەیەکی ڕاستەقینە لە مەیدانەکانی جەنگەوە بۆ مەیدانەکانی بنیاتنان، لە سەردەمی چەکەوە بۆ سەردەمی ئاشتی، و لە قۆناخی بەرگری لە سووریاوە بۆ قۆناخی بونیادنانی سووریا.
مافی خوێندن بە زمانی کوردی یەکێکە لە گرنگترین ئەو مافانەی کە گەلی کوردمان دەیان ساڵە هەوڵی بۆ دەدات، بەڕێز سەرۆک لە چەندین بۆنەدا جەختی لە پاراستنی ئەم مافە کردووەتەوە.
هەروەها هەڵوێستێکی کراوەمان لێ بەدی کرد سەبارەت بە مافی خوێندن بە زمانی دایک و پەرەپێدانی بڕیاری ئێستا لە داهاتوودا. ئێمە کار لەسەر جێبەجێکردنی ئەم بڕیارە لەم ساڵەدا دەکەین، بۆ ئەوەی بتوانین لە داهاتوویەکی نزیکدا بناخەی زیاتری لەسەر دابنێین.
ئەو سووریایەی ئێمە دەمانەوێت بنیاتی بنێین، سووریایەکە بۆ هەموو گەل و پێکهاتەکانی لە عەرەب، کورد، سریانی، ئاشووری، تورکمان و هتد. سووریایەکی یەکگرتوو و ئارام کە ماف و کەرامەتی هەموو هاووڵاتییانی بپارێزێت و پاشەڕۆژێکی باشتر بۆ نەوەکانی داهاتوو دابین بکات.
دووبارە شەهیدەکانمان بە منەتبارییەوە یاد دەکەینەوە.. سڵاو و ڕێز بۆ هاوسەنگەران و گەلەکەمان دەنێرین.
