رووداو دیجیتاڵ
لە پێشبڕکێیەکی جیهانیدا لە بەغدا، لەنێو دەیان وەستا و شارەزای مۆبایل، گەنجێکی کوردی کەرکووک پلەی یەکەمی بەدەستهێنا و ریکۆردێکی جیهانی شکاند.
ئەحمەد ئازاد، شارەزا و وەستای چاککردنەوەی مۆبایلە. لە پێشبڕکێیەکەدا لەپاڵ چەندین وەستای دیکە لە پارێزگاکانی عێراق و سووریا، لیبیا و وڵاتانی دیکە، بە ماوەیەکی کەمی پێوانەیی توانی شاشەی مۆبایلی ئایفۆن ببەستێتەوە.
ئەحمەد ئازاد بە رووداوی گوت، "پێشبڕکێکە لە بەغدا رێکخرابوو و، جیهانییە، پێشتر هەمان پێشبڕکێ لە وڵاتانی دیکە کراوە"
باسی لەوەش کرد، "توانیم بە 2:20 چرکە شاشەی مۆبایلێکی ئایفۆن 13ی پرۆماکس ببەستمەوە و چاکی بکەمەوە، ئەمە ژمارەیەکی پێوانەییە لە خێراییدا".
پێشتر ئەم ریکۆردە بەناوی کەسێکی دیکەوە بووە بە 2:30 چرکە، ئێستا ئەحمەد ناوی لەنێو 10 باشترین شارەزای مۆبایلدایە لە جیهان.
