رووداو دیجیتاڵ
کەشناسیی پارێزگای ورمێ هۆشداری دەداتە هاونیشتمانییان و داوایان لێدەکات، لە دەوروبەری رووبارەکان دووربکەونەوە، چونکە ئەگەری دروستبوونی لافاو هەیە.
رۆژی شەممە، 29ـی ئابی 2026، کەشناسیی پارێزگای ورمێ لە رۆژهەڵاتی کوردستان رایگەیاند، بەپێی پێشبینیی کەشناسی، لە ئێوارەی ئەمڕۆوە شەپۆلێکی بارانبارینی بەخوڕ لەگەڵ رەشەبا ئەو پارێزگایە و بەتایبەت ناوچەکانی باکووری پارێزگاکە دەگرێتەوە و تاوەکو دووشەممە بەردەوام دەبێت.
کەشناسیی پارێزگای ورمێ دەڵێت، ئەگەری بەرزبوونەوەی ئاوی رووبارەکان و روودانی لافاو هەیە، بۆیە دۆخی زەردی هۆشدار راگەیەندراوە و داوا لە خەڵک دەکەن، سەردانی ناوچە کوێستانییەکان نەکەن و لە نزیک رووبار و ئەو شوێنانەی ئەگەری روودانی لافاویان هەیە، نەمێننەوە.
کەشناسیی پارێزگای ورمێ هەروەها رایگەیاندووە، لە بەشێکی پارێزگاکە تەرزە دەبارێت و شەپۆلەکە خۆڵبارین، بای بەهێز و هەورەبرووسکەشی لەگەڵدایە.
