.png&w=3840&q=75)
رووداو دیجیتاڵ
پارێزگاری حەسەکە لە رۆژئاوای کوردستان، بەبۆنەی کۆچی دوایی شێخ عەبدولواحید ئیبراهیم شێخ عەبدولسەلام بارزانی، بروسکەیەکی سەرەخۆشی ئاراستەی سەرۆک مەسعود بارزانی و بنەماڵەی بارزانی دەکات و رایدەگەیێنێت، کۆچی دوایی ئەو خەسارەتێکی گەورەیە بۆ هەموو گەلانی ناوچەکە.
رۆژی دووشەممە، (07-09-2026) لەلایەن نووسینگەی پارێزگاری حەسەکەوە پرسەنامەیەک بڵاوکراوەتەوە، تێیدا هاتووە، نورەدین ئەحمەد، پارێزگاری حەسەکە، پرسە و هاوخەمی خۆی و خەڵکی پارێزگاکەی بۆ کۆچی دوایی کۆچی دوایی شێخ عەبدولواحید ئیبراهیم شێخ عەبدولسەلام بارزانی دەربڕیوە.
لە بروسکەکەی پارێزگاری حەسەکەدا هاتووە: "بە خەم و پەژارەیەکی قووڵەوە هەواڵی کۆچی دوایی برا گەورەی جەنابتانمان پێگەیشت. کۆچی دوایی کەسایەتییەکی خاوەن خەبات و خاوەن کاریگەر، تەنیا بۆ جەنابتان و بنەماڵەی رێزداری بارزانی نییە، بەڵکو بۆ تەواوی گەلی ناوچەکە خەسارەتێکی گەورەیە."
پارێزگاری حەسەکە لە پەیامەکەیدا ئاماژەی بەوەش کردووە کە رێز و یادەوەرییەکانی ئەو کەسایەتییە لە دڵی کۆمەڵگەدا بە زیندوویی دەمێننەوە و دەڵێت: "لەو کاتە سەخت و پڕ لە خەمەدا، بە ناوی خۆم و سەرجەم گەلی پارێزگای حەسەکەوە، سەرەخۆشییەکی گەرم ئاراستەی جەنابتان و بنەماڵەی بارزانی و هەموو خۆشەویستانتان دەکەم."
لە کۆتایی پەیامەکەشدا هاتووە: "ئێمە هاوبەشی خەمتانین و دەڵێین جەژنی ئێوە جەژنی ئێمەیە و خەمی ئێوەش خەمی هەموومانە. داواکارین لە خوای میهرەبان بە بەهەشتی بەرینی شاد بکات و سەبووری و ئارامی بە هەموو لایەک ببەخشێت."
