رووداو دیجیتاڵ
شاندێکی حکومەتی هەرێمی کوردستان لە بەغدا لەگەڵ وەزیرانی نەوت، دارایی و پلاندانانی عێراق کۆبوونەوە. سەرۆکی شاندەکە دەڵێت، پشکی هەرێمی کوردستانیان لە پڕۆژەی یاسای بودجەی ساڵی 2027 تاوتوێ کردووە و بۆ مافەکانی هەرێمی کوردستان لەگەڵ بەرپرسانی عێراق هاوئاهەنگی دەکەن.
ئومێد سەباح، سەرۆکی دیوانی ئەنجوومەنی وەزیرانی هەرێمی کوردستان، ئێوارەی چوارشەممە 9ی ئەیلوولی 2026 لە راگەیێندراوێکدا رایگەیاند: "شاندی باڵای دانوستاندکاری حکومەتی هەرێمی کوردستان لە بەغدا دەستی بە بەرنامەی کار و کۆبوونەوەکانی خۆی لەگەڵ وەزارەتە پەیوەندیدارەکانی حکومەتی فیدڕاڵ کرد، بە مەبەستی بەشداریکردن لە قۆناخی ئامادەکردن و گەڵاڵەکردنی رەشنووسی پڕۆژە یاسای بودجەی فیدڕاڵ بۆ ساڵی 2027 و جێگیرکردنی پشک و شایستە دەستووری و داراییەکانی هەرێمی کوردستان".
سەرۆکی دیوانی ئەنجوومەنی وەزیران ئاماژەی بەوە کردووە، یەکەم کۆبوونەوەی شاندی هەرێمی کوردستان ئەمڕۆ لەگەڵ فالح ساری، وەزیری دارایی عێراق و وەزیری پلاندانان بە وەکالەت کردووە. راشیگەیاندووە: "شاندی هەرێمی کوردستان بەشداریکردنی نوێنەرانی حکومەتی هەرێمی کوردستان لە قۆناخی گەڵاڵەکردنی رەشنووسی پڕۆژە یاسای بودجە لە وەزارەتی دارایی فیدڕاڵ بە هەنگاوێکی گرنگ و ئەرێنی هەڵسەنگاند و تێڕوانین و پێشنیازەکانی هەرێمی کوردستانی سەبارەت بە پڕۆژە یاساکە خستەڕوو".
لەبارەی داواکانی شاندی هەرێمی کوردستان، ئومێد سەباح دەڵێت: "جەخت لەسەر پێویستی جێگیرکردنی پشک و شایستەکانی هەرێمی کوردستان بە شێوەیەکی دادپەروەرانە و لەسەر بنەمای دەستوور و یاسا کرا؛ بە مەبەستی دانانی بنەمایەکی جێگیر و روون بۆ رێکخستنی پەیوەندییە داراییەکانی نێوان هەردوو حکومەت".
بەگوێرەی راگەیێندراوەکەی سەرۆکی دیوانی ئەنجوومەنی وەزیران، وەزیری دارایی عێراق "دڵنیایی دا، کە وەزارەتی دارایی فیدڕاڵ لە رۆشنایی دەستوور و یاسا پەیوەندیدارەکاندا، بە دادپەروەرانە مامەڵە لەگەڵ ماف و شایستە داراییەکانی هەرێمی کوردستان دەکات".
هەر ئەمڕۆ شاندی هەرێمی کوردستان سەردانی وەزارەتی پلاندانانی عێراقی کردووە و لەگەڵ بریکاری وەزارەتەکە کۆبوونەتەوە. ئومێد سەباح دەڵێت: "جەختمان لەوە کردەوە، کە هەرێمی کوردستان شایستەی پشکی خۆیەتی لە تەرخانکراوەکانی پڕۆژەکانی وەبەرهێنان، بەگوێرەی دوایین سەرژمێریی گشتیی دانیشتووان، سەرباری تەرخانکراوەکانی پڕۆژەکانی پەرەپێدانی هەرێم و پارێزگاکان و پترۆدۆلار".
یەکێکی دیکە لە داواکانی شاندی هەرێمی کوردستان لە وەزارەتی پلاندانانی عێراق، جێگیرکردنی شایستەی هەرێمی کوردستان بۆ وەرگرتنی پشکی خۆی لە قەرز، هاوکاری و بەخشینە نێودەوڵەتییەکان بووە. بەگوێرەی راگەیێندراوی سەرۆکی دیوانی ئەنجوومەنی وەزیران کە سەرۆکایەتیی شاندەکەی هەرێمی کوردستان دەکات، "وەزارەتی پلاندانانی فیدڕاڵ پێشوازی لە پێشنیازەکان کرد و ئامادەیی خۆی بۆ تاوتوێکردنیان لە قۆناخی ئامادەکردنی پڕۆژە یاسای بودجە دەربڕی؛ هەردوو لایەن لەسەر بەردەوامیی هاوئاهەنگیی تەکنیکی و یاسایی لەم بوارەدا رێککەوتن".
کۆبوونەوەیەکی دیکەی شاندی هەرێمی کوردستان لەگەڵ وەزیری نەوتی عێراق بووە و تێیدا تاوتوێکردنی ئەو بڕگانەی پڕۆژە یاسای بودجەی فیدڕاڵ کراوە، کە پەیوەندییان بە کەرتی نەوتەوە هەیە، لەوانە تێکڕای بڕی نەوتی خەمڵێنراو بۆ هەناردەکردن، بە کێڵگە نەوتییەکانی هەرێمی کوردستانیشەوە، نرخی خەمڵێنراوی بەرمیلێک نەوت بۆ ساڵی دارایی 2027 و بڕی نەوتی تەرخانکراو بۆ بەکارهێنانی نێوخۆ.
بەگوێرەی راگەیێندراوی سەرۆکی شاندەکەی هەرێمی کوردستان، "جەخت کرایەوە کە نەوتی بەرهەمهاتووی هەرێمی کوردستان بۆ هەناردەکردن رادەستی کۆمپانیای سۆمۆ دەکرێت، لە بازاڕە جیهانییەکان دەفرۆشرێت و داهاتەکەی بۆ گەنجینەی فیدڕاڵ دەگوازرێتەوە؛ ئەمەش هەنگاوێکی گرنگە بۆ بەهێزکردنی هاوکاریی نێوان هەردوو حکومەت و زیادکردنی داهاتی گشتیی فیدڕاڵ".
وەزیری نەوتی عێراق پێشوازی لە پێشنیازەکانی شاندی هەرێمی کوردستان کردووە و رایگەیاندووە، بەردەوام دەبن لە هاوئاهەنگیی یەکدی و کاری هاوبەش بۆ گەیشتن بە داڕشتنێکی "هاوسەنگ و کرداری" بۆ بڕگە نەوتییەکانی بودجەی 2027 و مسۆگەرکردنی بەردەوامیی بەرهەمهێنان و هەناردەکردنی نەوت. ئەمەش بەگوێرەی راگەیێندراوەکەی ئومێد سەباح.
لە راگەیێندراوەکەدا هاتووە: "لە کۆی کۆبوونەوەکاندا، جەخت لەسەر چارەسەرکردنی بابەتە هاوبەشەکان لە رێگەی گفتوگۆ، هاوئاهەنگی و پابەندبوون بە بنەما دەستووری و یاساییەکان کرایەوە، بە ئامانجی جێگیرکردنی ماف و شایستەکانی هەرێمی کوردستان لە پڕۆژە یاسای بودجەی فیدڕاڵ بۆ ساڵی 2027 و بەهێزکردنی هاوکاریی دارایی و ئابووریی نێوان حکومەتی هەرێم و حکومەتی فیدڕاڵ".
سەرۆکی شاندی دانوستاندکاری هەرێمی کوردستان ئاماژەی بەوە کردووە، ئامادەییان دەربڕیوە بۆ جێبەجێکردنی ئەرک و پابەندییە دەستووری و یاساییەکانیان.
