رووداو دیجیتاڵ
فراکسیۆنی پارتی دیموکراتی کوردستان بە فەرمی سەرۆکایەتیی لیژنەی مادەی 140 و لیژنەی ئابووری لە ئەنجوومەنی پارێزگای کەرکووک وەرگرت.
حەسەن مەجید، سەرۆکی فراکسیۆنی پارتی لە ئەنجوومەنی پارێزگای کەرکووک بە تۆڕی میدیایی رووداوی راگەیاند، بە فەرمی سەرۆکایەتی دوو لیژنەی ئەنجوومەنەکەیان وەرگرتووە.
ئەو گۆڕانکارییە لە سەرۆکایەتیی لیژنەکاندا لە کۆبوونەوەی رۆژی سێشەممە 8ی ئەیلوولی ئەنجوومەنی پارێزگای کەرکووک بڕیاری لێدراوە بۆ دووبارە دابەشکردنەوەى 14 لیژنەکەى ئەنجوومەنەکە.
حەسەن مەجید رایگەیاند، جگە لە سەرۆکایەتیی لیژنەکان، وەک دوو ئەندامەکەى فراکسیۆنەکەیان هەریەکەیان ئەندام دەبن لە سێ لیژنەی دیکە.
بەگوێرەی ئەو گۆڕانکارییە، حەسەن مەجید، سەرۆکایەتیی لیژنەی ئابووری و دارایی و پلاندانانی ستراتیژی و گەشەپێدانی وەرگرتووە و لەهەمان کاتدا ئەندام دەبێت لە لیژنەکانی دەستپاکی، پڕۆژەکان و خزمەتگوزاری.
شۆخان حەسیب کە ئەندامی فراکسیۆنی پارتییە لە ئەنجوومەنی پارێزگای کەرکووک، سەرۆکایەتیی لیژنەی مادەی 140 و مافی مرۆڤ و وەرزش و لاوانى وەرگرتووە، لەهەمان کاتدا ئەندام دەبێت لە لیژنەکانی پەیوەندییەکان، یاسایی و وەبەرهێنان.
رۆژی 28ـی تەممووزی 2026، فراکسیۆنی پارتی دیموکراتی کوردستان، دوای بایکۆتێکی درێژخایەن کە زیاتر لە ساڵ و نیوێکی خایاند، گەڕایەوە نێو کۆبوونەوەکانی ئەنجوومەن، بایکۆتەکەشیان بە هۆی پێکهێنانی حکومەتی خۆجێیی شارەکە بوو کە تێیدا پارتی و چەند فراکسیۆنێکی عەرەبی و تورکمان بەشدار نەبوون.
