رووداو دیجیتاڵ وەزیری پێشمەرگەی حکومەتی هەرێمی کوردستان، کۆتاییهاتنی پرۆسەی یەکخستنەوە و رێکخستنەوەی تەواوەتیی هێزەکانی 70 و 80ـی پێشمەرگەی لەژێر چەتری وەزارەتەکەی راگەیاند و دەڵێت، هەرێمی کوردستان بووە خاوەنی سوپایەکی یەکگرتوو. رۆژی پێنجشەممە، 10ـی ئەیلوولی 2026، شۆڕش ئیسماعیل، وەزیری پێشمەرگەی حکومەتی هەرێمی کوردستان، لە راگەیێندراوێکدا مژدەی "یەکخستنەوەی تەواوەتیی هێزەکانی پێشمەرگە"ـی راگەیاند. لە راگەیێندراوەکەدا هاتووە: "دوای چەندین ساڵ تێکۆشان، هەوڵدانی بەردەوام و وەک یەک تیمی پێکەوەیی لە وەزارەتی پێشمەرگە، لەگەڵ فەرماندەی فەرماندەیی هێزەکانی حەفتا و هەشتا کە هاوکار و رێگەخۆشکەربوون، توانیمان سەرجەم بەربەست و گرفتە کەڵەکەبووەکان تێپەڕێنین." وەزیری پێشمەرگە ئاماژەی بەوە کردووە، هێزەکانی 70 و 80 بە پرۆسەیەکی ورد، سەربازییانە و پلان بۆ داڕێژراو یەکخراونەتەوە. دەشڵێت: "لە چوارچێوەی ئەم چاکسازییە ریشەییەدا، تەواوی هێزەکان لەسەر ئاستی یەک فەرماندەیی و کۆنترۆڵ (لیوا، فیرقە و فەرماندەیی دەڤەر) رێکخرانەوە. بە خۆشحاڵییەوە رایدەگەیێنین کە هەردوو دەڤەری فەرماندەیی سەربازی بەفەرمی دەستبەکار دەبن." لە بەشێکی دیکەی راگەیێندراوەکەدا هاتووە، ئەمە دەستکەوتێکی مێژووییە و هەرێمی کوردستان دەبێتە خاوەنی سوپایەکی یەکگرتوو و سەردەمیانە، لەژێر فەرماندەیی راستەوخۆی وەزارەتی پێشمەرگەدا. سەبارەت بە هاوکارییەکان بۆ سەرخستنی ئەم پرۆسەیە، شۆڕش ئیسماعیل روونیکردووەتەوە، ئەم دەستکەوتە گەورەیە ئەنجامی پاڵپشتیی راستەوخۆ و بەردەوامی سەرۆکی هەرێمی کوردستان، سەرۆکی حکومەت و جێگری سەرۆکی حکومەت بووە. هەروەها ستایشی رۆڵی گرنگ و باڵای هاوپەیمانانی بە سەرکردایەتیی ویلایەتە یەکگرتووەکانی ئەمریکا کردووە لە چوارچێوەی یاداشتنامەی لێکتێگەیشتنی نێوانیاندا. لە کۆتایی راگەیێندراوەکەدا، وەزیری پێشمەرگە داوا لە هێزەکانی هاوپەیمانان دەکات لە قۆناخی داهاتوودا، بە شێوازێکی جیاوازتر بەردەوام بن لە پشتیوانیکردنی هێزی پێشمەرگەی یەکگرتووی کوردستان. ساڵی 2022 وەزارەتی پێشمەرگە قۆناخی یەکەمی یەکخستنەوەی هێزەکانی پێشمەرگەی راگەیاند و رۆژی 10ـی ئەیلوولی 2026 پرۆسەکە کۆتاییهات.
