رووداو دیجیتاڵ
یاریدەدەری وەزیری ناوخۆی سووریا لەبارەی "شەهیدکردنی" شەڕڤانێک لە پارێزگای حەسەکە رایدەگەیێنێت، لایەنە پەیوەندیدارەکان دەستیان بە لێکۆڵینەوە کردووە و بەشێک لە تۆمەتبارانی ئەو تاوانە دەستگیرکراون و بەدواداچوون بۆ دەستگیرکردنی سەرجەم ئەنجامدەرانی دیکە بەردەوامە.
سیپان عەلی ئوسو، یاریدەدەری وەزیری ناوخۆی سووریا لە پەیامێکدا پرسە و سەرەخۆشیی خۆی بۆ بنەماڵەی "سامی شێخموس حەسۆ" دەردەبڕێت، کە لە "تاوانێکی دڕندانە" لە پارێزگای حەسەکە گیانی لەدەستداوە.
لە پەیامەکەیدا، سیپان عەلی ئوسو سەرکۆنەی هەر جۆرە پەیام و گوتارێکی هاندان بۆ تووندوتیژی و کوشتن دەکات و داوا لە خەڵک دەکات "خۆڕاگر و ئارام بن" و رێگە نەدەن کەشوهەوایەک بۆ دروستکردنی ئاژاوەگێڕی دروست بکرێت.
یاریدەدەری وەزیری ناوخۆی سووریا دەشڵێت: "لایەنە پەیوەندیدارەکان بە خێرایی هەنگاویان ناوە و ژمارەیەک لەو کەسانەی لەو تاوانەدا تێوەگلاون دەستگیرکراون، هەوڵەکانیش بۆ دەستگیرکردنی سەرجەم تاوانباران بەردەوامە تاوەکو رادەستی دادگا بکرێن و بەپێی یاسا سزای دادپەروەرانەی خۆیان وەربگرن."
