رووداو دیجیتاڵ
بەرپرسێکی کۆمەڵەی شۆڕشگێڕی کوردستانی ئێران لە ناوچەی زڕگوێزەڵە لە پارێزگای سلێمانی دەڵێ، بە سێ مووشەک هێرش کراوەتە سەریان. قایمقامی هەڵەبجەش هەبوونی بۆردوومان لە سنوورەکەیان رەت دەکاتەوە.
عەلی رەنجبەری، بەرپرسی پەیوەندییەکانی کۆمەڵەی شۆڕشگێڕی زەحمەتکێشانی کوردستانی ئێران، ئەمڕۆ دووشەممە بە تۆڕی میدیایی رووداوی گوت: "کاژێر 03:10ی بەرەبەیانی ئەمڕۆ هێرش کرایە سەر کەمپی بنەماڵەکانی کۆمەڵەی شۆڕشگێڕی زەحمەتکێشانی کوردستانی ئێران لە ناوچەی زڕگوێزەڵە. هێرشەکە زیانی گیانی نەبوو".
بە گوتەی ئەو بەرپرسەی کۆمەڵەی شۆڕشگێڕی زەحمەتێکشانی کوردستانی ئێران، هێرشەکە بە سێ مووشەک کراوە.
هەر ئەمڕۆ دەنگۆی هەبوونی هێرشی درۆنی بۆ سنووری هەڵەبجە بڵاوکرایەوە، بەڵام سمکۆ سالار، قایمقامی هەڵەبجە بە تۆڕی میدیایی رووداوی گوت: "هیچ هێرشێک لە سنوورەکەمان نەبووە".
بەگوێرەی بەدواداچوونی تۆڕی میدیایی رووداو بۆ ئەو هێرشانەی دەکرێنە سەر هەرێمی کوردستان، لە دەستپێکی جەنگەکەوە تاوەکو کۆتایی مانگی رابردوو، بە 983 درۆن و مووشەک هێرش کراوەتە سەر هەرێمی کوردستان، لە ئەنجامدا 32 کەس گیانیان لەدەستداوە و 156 کەسیش بریندار بوون.
