رووداو دیجیتاڵ
لە سنووری قەزای دووبز لە پارێزگای کەرکووک، بۆمبێکی چێندراوی چەکدارانی داعش بە ئۆتۆمبێلێکی سەربازیی سوپای عێراقدا تەقییەوە و بەهۆیەوە ئەفسەرێک بە پلەی رائید بریندار بوو.
رۆژی چوارشەممە، 16ـی ئەیلوولی 2026، عامر شوانی، گوتەبێژی پۆلیسی کەرکووک بە تۆڕی میدیایی رووداوی راگەیاند: "نزیک کاژێر 12:30ـی شەو بۆمبێکی چێندراوی کۆنی داعش لە شاخی غەرە لە قەزای دووبز، کە شوێنێکی سنوورییە و دەکەوێتە نزیک قەرەچووخ، بە ئەفسەرێک و سێ سەربازدا تەقیوەتەوە."
سەبارەت بە تەندروستیی بریندارەکە، عامر شوانی دەڵێ: "ئەفسەرەکە پلەکەی رائیدە و لە رووداوەکەدا بریندار بووە، چارەسەری پزیشکیی وەرگرتووە و ئێستا تەندروستیی جێگیرە."
گوتەبێژی پۆلیسی کەرکووک ئاماژەی بەوەش کرد، ئەو ئەفسەر و سەربازانە سەر بە فەوجی 3ـی لیوای 32ـی فیرقەی 8ـی سوپای عێراق بوون و لە کاتی تێپەڕبوونیان بە ناوچەکەدا، لە نێو ئۆتۆمبێلێکی سەربازی لە جۆری هەمەڕدا بوون.
رووداوەکە کاژێر 12:30ی بەیانیی ئەمڕۆ چوارشەممە روویداوە و لەکاتی تێپەڕبوونی کاروانێکی فەوجی سێی لیوای 32ی سوپای عێراقیدا بۆمبەکە بە ئۆتۆمبێلەکەدا تەقیوەتەوە.
