رووداو دیجیتاڵ
هەوڵەکان بۆ پێکهێنانی حکومەتی هەرێمی کوردستان چڕکراونەتەوە، پەرلەمانتارێکی نەوەی نوێ دەڵێت، رێککەوتنەکەمان لەگەڵ یەکێتی وەک خۆی ماوە و هیچ نەگۆڕاوە.
رۆژی چوارشەممە، 16ـی ئەیلوولی 2026، محەممەد سلێمان، پەرلەمانتاری نەوەی نوێ کە پێشتر سەرۆکی بەتەمەنی ئەم خولەی پەرلەمانی کوردستان بوو، بە رووداوی گوت: "هاوپەیمانێتییەکەمان لەگەڵ یەکێتیی نیشتمانیی کوردستان وەک خۆی ماوەتەوە و هیچ شتێک نەگۆڕاوە."
سەبارەت بەوەی یەکێتی و پارتی بەتەنیا حکومەت پێکدەهێنن، ئەو پەرلەمانتارەی نەوەی نوێ ئاماژەی بەوە کرد، جارێ هیچ شتێک بڵاونەبووەتەوە کە یەکێتی و پارتی رێککەوتنیان کردبێت، یەکێتیش هیچ شتێکی بە ئێمە نەگوتووە.
ئەمە لە کاتێکدایە دوێنێ سێشەممە، 15ـی ئەیلوول، هیمداد شاهین، گوتەبێژی نەوەی نوێ رایگەیاند، نەوەی نوێ بەهیچ شێوەیەک بەشداریی حکومەتی نوێی هەرێمی کوردستان ناکات و بە ئۆپۆزیسیۆن دەمێنێتەوە.
رۆژی 2ـی تەممووزی 2026 لە شاری سلێمانی، یەکێتیی نیشتمانیی کوردستان و نەوەی نوێ رێککەوتنێکیان بە ناونیشانی (هاوپەیمانیی هاوسەنگی و بووژانەوە) واژۆ کرد و ئاماژەیان بەوە کرد بە یەک هاوپەیمانێتی گفتوگۆ لەسەر پێکهێنانی حکومەتی داهاتووی هەرێمی کوردستان دەکەن.
.jpeg&w=3840&q=75)
