رووداو دیجیتاڵ
هێزە ئەمنییەکانی ئێران لە شاری دیواندەرەی سەر بە پارێزگای سنە لە رۆژهەڵاتی کوردستان کچێکی گەنجیان دەستبەسەر کردووە و تاوەکو ئێستا چارەنووسی نادیارە.
بەپێی راپۆرتی رێکخراوەکانی مافی مرۆڤ لە رۆژهەڵاتی کوردستان، دوێنێ چوارشەممە 16ی ئەیلوولی 2026، کچێک بەناوی "دونیا وەیسی" کە تەمەنی 30 ساڵە و خەڵکی دیواندەرەیە، لەلایەن هێزەکانی ئیتڵاعاتەوە دەستگیر کراوە.
رێکخراوەکانی مافی مرۆڤ ئاماژەیان بەوەش کردووە، هێزە ئەمنییەکان بەبێ پێشاندانی هیچ بەڵگەنامەیەکی یاسایی و بڕیاری دادگە، هەڵیانکوتاوەتە سەر ماڵی ئەو کچە و دەستبەسەریان کردووە، پاشانیش بۆ شوێنێکی نادیار گواستوویانەتەوە.
بەپێی زانیارییەکان، بەر لە دەستگیرکردنی، ئیتڵاعاتی دیواندەرە چەند جارێک لە رێگەی پەیوەندیی تەلەفۆنییەوە داوای لە دونیا وەیسی کردووە سەردانی بارەگاکەیان بکات، بەڵام ئەو ئامادە نەبووە بچێت.
سەرەڕای بەدواداچوونی بەردەوامی کەسوکارەکەی بۆ دامودەزگا ئەمنیی و دادوەرییەکان، تاوەکو ئێستا هیچ زانیارییەک لەسەر چارەنووس، شوێنی راگرتن و ئەو تۆمەتانەی ئاراستەی دونیا وەیسی کراون لەبەردەستدا نییە.
.jpg&w=3840&q=75)
