رووداو دیجیتاڵ
هاوسەرۆکی کۆنسەی بەڕێوەبەریی کۆما جڤاکێن کوردستان (کەجەکە) پەیوەست بە پرۆسەی چارەسەری رایگەیاند، بۆ سەرکەوتنی پرۆسەکە پێویستە نوێنەرانی کەجەکە سەردانی عەبدوڵڵا ئۆجەلان بکەن لە زیندانی ئیمراڵی.
جەمیل بایک، لە هەڤپەیڤینێکدا لەگەڵ کەناڵی (نووچە تی ڤی) ئاماژەی بەوە کرد، ئەو یاسایەی لە پەرلەمانی تورکیا دەرچووە بە تەواوی داواکارییەکانیان وەڵام ناداتەوە و ئامانجی سەرەکیی دەوڵەت لێی چەککردنی پەکەکەیە، بەڵام سەرەڕای کەموکوڕییەکان وەک بنەمایەک سەیر دەکرێت.
هاوسەرۆکی کەجەکە ئاماژەی بەوە کرد، پەیوەندییەکانیان لەگەڵ عەبدوڵڵا ئۆجەلان لە رێگەی شاندی پارتی یەکسانی و دیموکراسیی گەلانەوە (دەم پارتی)یەوە و گوتی: دەبێ رێگە بە رۆژنامەڤان، راوێژکار و نوێنەرانی کەجەکە بدرێت سەردانی ئیمراڵی بکەن تاوەکو راستەوخۆ لەگەڵ ئۆجەلان کۆببنەوە، چونکە بەبێ ئەمە پرۆسەکە بە دروستی بەرەو پێش ناچێت.
بایك هەروەها رایگەیاند، ئەوان مەبەستیان هەڵوەشاندنەوەی دەوڵەتی تورکیا نییە، بەڵکو داوای جێگیرکردنی مافە دەستوورییەکانی گەلی کورد، ئازادکردنی زیندانییە سیاسییەکان و دابینکردنی مەرجەکانی ئازادیی ئۆجەلان دەکەن بۆ چەکدانان.
ئەم داواکارییەی کەجەکە لە کاتێکدایە کە چەند رۆژێکە پرسی دروستکردنی یەکەیەکی نیشتەجێی تایبەت بە ئۆجەلان لە دوورگەی ئیمراڵی بووەتە رۆژەڤی تورکیا.
محەممەد ئوچوم، راوێژکاری باڵای سەرۆککۆماری تورکیا رایگەیاندبوو، ئەو جێگەیە بۆ ئەوەیە تاوەکو ئۆجەلان لە چوارچێوەی لیژنەی ستراتیژی و چەکدانانی تایبەت بە پرۆسەی چارەسەری رۆڵی خۆی بگێڕێت.
لەو بارەیەوە دەوڵەت باخچەلی، سەرۆکی مەهەپەش رایگەیاند، "ئەو ماڵە بۆ ئەوە دروستکرا تاوەکو بتوانێت دیداری تێدا بکات و پەیامەکانی بگەیێنێت."
کۆما جڤاکێن کوردستان (کەجەکە) وەک چوارچێوەیەکی رێکخراوەیی کار دەکات کە پارتی کرێکارانی کوردستان (پەکەکە) و چەندین رێکخراوی دیکەی سیاسی و کۆمەڵایەتیی نزیک لەو ئاراستەیە لەخۆدەگرێت.
لەم ساڵانەی دواییدا لە رێگەی نێوەندگیریی شاندە سیاسییەکان و پەرلەمانتارانەوە پەیام لە نێوان عەبدوڵڵا ئۆجەلان و بزووتنەوەکەدا گۆڕدراوەتەوە.
