رووداو دیجیتاڵ
پێنج هاونیشتمانی لە شاری ورمێ دەستگیر کران. رێکخراوەکانی مافی مرۆڤ دەڵێن، دوای هەڵکوتانی هێزە ئەمنییەکان بۆ سەر ماڵ و شوێنی کاریان، هەر پێنجیان بردراونەتە شوێنێکی نادیار.
رێکخراوی مافی مرۆڤی هەنگاو کە لەبارەی رووداوەکانی رۆژهەڵاتی کوردستان چالاکە رایگەیاند، رۆژی چوارشەممە 16-09-2026، فەرهەنگ دێهقان، هاونیشتمانیی خەڵکی مەرگەوەڕی شاری ورمێ، ماڵەکەی خۆیدا لەلایەن هێزە ئەمنییەکانەوە دەستگیر کراوە.
بەگوێرەی زانیارییەکان، دوای دەستبەسەرکردنی، (فەرهەنگ دێهقان) بۆ شوێنێکی نادیار گواستراوەتەوە و تاوەکو ئێستا هیچ زانیارییەک لەسەر هۆکاری دەستگیرکرانی نەخراوەتەڕوو.
هەر رۆژی چوارشەممە، (مەجید ئیبتهاج)، دانیشتووی گوندی زێوەی سەر بە ناوچەی مەرگەوەڕی شارەکە، (واحید شەعبانی)، (بەهادور ئەسەدی) و (ساڵح دربوبەچیچەک) کە هەرسێکیان دانیشتووی گوندی (گەسیان)ـن لە مەرگەوەڕ، دەستگیر کراون.
تاوەکو ئێستا لایەنە پەیوەندیدارەکان هیچ زانیارییەکایان لەسەر هۆکاری دەستبەسەرکردن یان شوێنی راگرتنی ئەو پێنج هاونیشتمانییە بڵاو نەکردووەتەوە.
دەستگیرکردنی ئەو هاونیشتمانییانە لەکاتێکدایە، لە شارەکانی کامێران و شنۆی رۆژهەڵاتی کوردستانیش لانیکەم چوار هاونیشتمانی بە ناوەکانی (یاسر حوسێنی)، (موحسین ئەسەدی)، (عەبدولباست باپیری) و (ئەحمەد حاجیپوور) بە هۆکاری رانەگەیێندراو دەستگیر کراون.
