رووداو دیجیتاڵ
وادەی خۆتۆمارکردن لە (هەژماری من) کۆتایی هاتووە، بەڵام 1400 کەسوکاری شەهید لە سلێمانی (هەژماری من)یان پڕنەکردووەتەوە. بەڕێوەبەرایەتیی کاروباری شەهیدان دەڵێ، پێویستە زوو بێن و فۆرمەکە پڕ بکەنەوە.
ئەدیب لەتیف، بەڕێوەبەری گشتیی کاروباری شەهیدان و ئەنفالکراوانى سلێمانی بە رووداوی گوت: "هەرچەندە وادەی خۆتۆمارکردن لە پرۆژەی (هەژماری من) لە هەرێمی کوردستان کۆتایی هاتووە، بەڵام زیاتر لە 1400 کەسوکاری شەهید و ئەنفالکراو (هەژماری من)یان پڕنەکردووەتەوە. داوایان لێ دەکەین هەرچی زووە سەردانمان بکەن".
سەبارەت بە هۆکاری پڕنەکردنەوەی (هەژماری من)، ئەدیب لەتیف ئاماژەی بۆ ئەوەکرد، کەسوکاری شەهیدان و ئەنفالکراوان زۆربەیان کەسانی بەتەمەنن یان لە گوندە دوورەدەستەکان و نەیانتوانیوە لە کاتی خۆیدا هەژمارەکە پڕبکەنەوە، هاوکات بەشێک لەو کەسانە لە ئەورووپان و نەیانتوانیوە بگەڕێنەوە.
ئەدیب لەتیف ئاماژەی بۆ ئەوەکرد، لەگەڵ وەزارەتی شەهیدانی هەرێمی کوردستان قسەیان کردووە و "پێیان گوتووین هەرچەندە وادەی پڕکردنەوەی فۆرمەکە بە فەرمی کۆتایی هاتووە، بەڵام لە ئەمڕۆ یەکشەممەوە بانگەواز بکەن بۆ ئەو کەسانە با (هەژماری من) پڕ بکەنەوە و ئەم مانگەش هاوکار دەبین مەترسی لەسەر مووچەکانیان دروست نەبێت".
31ی ئاب وادەی خۆتۆمارکردن لە پڕۆژەی (هەژماری من) لە هەرێمی کوردستان کۆتایی هات.
