رووداو دیجیتاڵ
ئەمڕۆ لە رێوڕەسمێکدا بە سەرپەرشتیی نێچیرڤان بارزانی، سەرۆکی هەرێمی کوردستان و فەرماندەی گشتیی هێزەکانی پێشمەرگە، یەکخستنی تەواوەتیی هێزەکانی پێشمەرگە رادەگەیێندرێ.
سەرۆکایەتیی هەرێمی کوردستان لە راگەیێندراوێکدا بڵاویکردەوە، بە سەرپەرشتیی نێچیرڤان بارزانی، فەرماندەی گشتیی هێزی پێشمەرگە، رێوڕەسمی راگەیاندنی یەکخستنی هێزی پێشمەرگەی کوردستان بەڕێوەدەچێت.
رۆژی دووشەممە، 21ـی ئەیلوولی 2026، بەرپرسێک لە سەرۆکایەتیی هەرێمی کوردستان بە تۆڕی میدیایی رووداوی راگەیاند، رێوڕەسمەکە کاژێر 10:30ـی بەیانی لە سەرۆکایەتیی هەرێمی کوردستان بەڕێوەدەچێت و تێیدا نێچیرڤان بارزانی، سەرۆکی هەرێمی کوردستان و فەرماندەی گشتیی هێزی پێشەرگە؛ مەسرور بارزانی، سەرۆکوەزیرانی هەرێمی کوردستان؛ شۆڕش ئیسماعیل، وەزیری پێشمەرگە و ژمارەیەکی دیکە لە بەرپرسانی باڵای هەرێمی کوردستان و هاوپەیمانان بەشدار دەبن.
سەرچاوەکە ئاماژەی بەوە کرد، ئامادەکارییەکان کراون.
سەبارەت بە شێوازی رێکخستنەوەی هێزەکان، لیوا روکن بەختیار محەممەد، ئەمینداری گشتیی وەزارەتی پێشمەرگە بە رووداوی گوت: "پەیکەری وەزارەتی پێشمەرگە دەگۆڕدرێ. هێزەکانی یەکەی 80 و یەکەی 70ی پێشمەرگە بە ناوی دەڤەری 1 و دەڤەری 2 دەچنە ژێر چەتری وەزارەتی پێشمەرگە و تاکە بارەگایان وەزارەت دەبێت. ئەوان سەر بە هیچ حیزبێک نامێنن و دەچنە سەر وەزارەتی پێشمەرگە".
لیوا روکن بەختیار محەممەد گوتی: "ئەم هەنگاوەش کاریگەریی زۆر باشی لە بوارەکانی کارگێڕی، دارایی و فەرماندەیی و کۆنترۆڵ (قیادە و سەیتەرە) دەبێت."
هێزەکانی یەکەی 70ـی سەر بە یەکێتیی نیشتمانیی کوردستان و یەکەی 80ـی سەر بە پارتی دیموکراتی کوردستانن و چاکسازییش لە وەزارەتی پێشمەرگە مێژووییەکی درێژی هەیە. لە ساڵی 2022 وەزارەتی پێشمەرگە قۆناخی یەکەمی یەکخستنەوەی راگەیاند و لە 10ی ئەیلوولی 2026 پرۆسەکە بە فەرمی گەیشتە قۆناخی کۆتایی.
رۆژی 10ی ئەیلوولی 2026، شۆڕش ئیسماعیل، وەزیری پێشمەرگەی هەرێمی کوردستان لە راگەیێندراوێکدا موژدەی "یەکخستنەوەی تەواوەتیی هێزەکانی پێشمەرگە"ی دا و گوتی: "دوای چەندین ساڵ تێکۆشان، هەوڵدانی بەردەوام و وەک یەک تیمی پێکەوەیی لە وەزارەتی پێشمەرگە، لەگەڵ فەرماندەی فەرماندەیی هێزەکانی 70 و 80 کە هاوکار و رێخۆشکەربوون، توانیمان سەرجەم بەربەست و گرفتە کەڵەکەبووەکان تێپەڕێنین."
وەزیری پێشمەرگە گوتی، پرۆسەکە بە پلانێکی سەربازیی ورد جێبەجێکراوە و گوتیشی: "تەواوی هێزەکان لەسەر ئاستی یەک فەرماندەیی و کۆنترۆڵ (لیوا، فیرقە و فەرماندەیی دەڤەر) رێکخرانەوە. هەردوو دەڤەری فەرماندەیی سەربازی بە فەرمی دەستبەکار دەبن".
