رووداو دیجیتاڵ
رۆژی دووشەممە، 21ی ئەیلوولی 2026، یوسف مەحموودزادە، بەڕێوەبەری کاروباری ئەشکەوتی سەهۆڵانی مهاباد، ئاماری گەشتیارانی ئەم ساڵی ئەشکەوتەکەی خستەڕوو و گوتی: "لە نەورۆزی ئەم ساڵەوە زیاتر لە 90 هەزار گەشتیاری نێوخۆیی و بیانی سەردانی ئەشکەوتی سەهۆڵانیان کردووە."
یوسف مەحموودزادە گوتی: "زیاتر لە 10%ی ئەو کەسانەی سەردانی ئەشکەوتەکەیان کردووە، گەشتیاری بیانین کە زیاترینیان خەڵکی عێراق و تورکیان."
بە گوتەی بەڕێوەبەری کاروباری ئەشکەوتی سەهۆڵان، گەشتیارانی دیکەش خەڵکی پارێزگا و شارە جیاوازەکانی ئێران و رۆژهەڵاتی کوردستان بوون کە شاری مهابادیان بۆ گەشتکردن هەڵبژاردووە و سەردانی ئەشکەوتی سەهۆڵانیشیان کردووە.
مەحموودزادە گوتیشی، ئێستا 13 بەلەم و 6 تیمی فریاکەوتن لە ئەشکەوتی سەهۆڵان جێگیرن و خزمەتی پێویست پێشکێشی گەشتیاران دەکەن.
بەڕێوەبەری کاروباری ئەشکەوتی سەهۆڵان ئاماژەی بەوەش کرد، ئەشکەوتی سەهۆڵان بە راکێشانی ئەم ژمارە گەشتیارە، بە یەکێک لە شوێنە گەشتیارییە هەرە پڕسەردانیکەرەکانی پارێزگای ورمێ دادەنرێ.
ئەشکەوتی سەهۆڵان بە دووری 42 کیلۆمەتر لە باشووری رۆژهەڵاتی شاری مهاباد و لەسەر رێگەی بۆکان هەڵکەوتووە. ئەشکەوتەکە شوێنەواری سەتەی سێیەمی پێش زایینی لێ دۆزراوەتەوە. شوێنەکە پێشتر لەنێو خەڵکی ناوچەکەدا بە کونە کۆترە بەنێوبانگ بوو.
سەهۆڵان لە ئاستی ئێراندا دوای ئەشکەوتی عەلیسەدری هەمەدان، دووەم ئەشکەوتی ئاویی گەورەیە.
مەودای وشکانیی ئەشکەوتی سەهۆڵان 250 مەتر و مەودا ئاوییەکەی 300 مەترە. نێو ئەشکەوتەکە کۆتر و شەمشەمەکوێرەی تێدایە. سەرچاوەی ئاوەکەی کانیاوی بن ئەشکەوتەکەن و قووڵییەکەی لە هەندێک شوێن دەگاتە 62 مەتر.
