رووداو دیجیتاڵ
لە هەردوو پارێزگای هەولێر و دهۆک نرخی بەنزین بە شێوەیەکی بەرچاو رووی لە دابەزین کردووە و بەشێوەیەک لە هەندێک جۆردا تاوەکو 450 دینار لە نرخەکەی شکاوە، بەڵام لە سلێمانی نرخەکان وەک خۆیان ماونەتەوە. سەرۆکی ئەنجوومەنی بەنزینخانەکانی هەولێریش ئاماژە بەوە دەکات کە دوای تەواوبوونی وەجبەی کۆن، نرخەکان زیاتریش دادەبەزن.
رۆژی شەممە، 26ـی ئەیلوولی 2026، جەنگی مەجید، سەرۆکی ئەنجوومەنی بەنزینخانەکانی هەولێر بە تۆڕی میدیایی رووداوی راگەیاند: "لە هەولێر نرخی بەنزین 400 دینار دابەزیوە. تاوەکو رۆژی پێنجشەممەی داهاتوو ئەو وەجبە کۆنەی بە گران هاوردە کرابوو تەواو دەبێت، دوای ئەوەش نرخەکان هێشتا زیاتر دادەبەزن و هەوڵ دەدرێت دۆخەکە بگەڕێتەوە ئاستی ئاسایی خۆی."
سەبارەت بە هۆکاری دابەزینەکەش، جەنگی مەجید گوتی: "ئەمڕۆ بەنزینی نۆڕماڵ بەکۆ بە 1350 دینار بۆمان هاتووە، هاوکات بڕێکی زۆری بەنزین لە عێراق و ئێرانەوە گەیشتووە و ئەمەش هۆکاری سەرەکیی دابەزینی نرخەکەیەتی."
هاوکات لە سنووری پارێزگای دهۆکیش نرخی سووتەمەنی دابەزیوە. خاوەنی یەکێک لە بەنزینخانەکانی دهۆک بۆ رووداو گوتی، نرخی هەر سێ جۆری بەنزین (نۆرماڵ، موحەسەن و سوپەر) 350 بۆ 450 دینار دابەزیوە و ئێستا لە بەشێک لە بەنزینخانەکان نرخەکان بەمشێوەیەن:
بەنزینی نۆرماڵ: لە 1850 دینارەوە دابەزیوە بۆ 1425 دینار.
بەنزینی موحەسەن: لە 2300 دینارەوە دابەزیوە بۆ 1925 دینار.
بەنزینی سوپەر: لە 2600 دینارەوە دابەزیوە بۆ 2250 دینار.
نرخەکان لە سلێمانی وەک خۆیانن
بەراورد بە هەولێر و دهۆک، نرخی بەنزین لە سلێمانی هەزرانتر بوو. بەپێی بەدواداچوونی رووداو، بە پێچەوانەی هەولێر و دهۆک، تاوەکو ئێستا لە سلێمانی نرخی بەنزین دانەبەزیوە و بەمشێوەیە دەفرۆشرێت:
بەنزینی نۆرماڵ: 1200 دینار.
بەنزینی موحەسەن: 1750 دینار.
بەنزینی سوپەر: 1900 دینار.
لە 6ـی حوزەیران نرخی یەک لیتر بەنزینی نۆرماڵ لە هەولێر بۆ هەزار و 175 دینار بەرزبووەوە و رۆژێک دواتر لە سلێمانیش نرخ بەرزبووەوە و گەیشتە هەزار و 50 دینار، لە دوای ئەو رێککەوتەوە بەنزین رۆژ بە رۆژ نرخی بەرزتر دەبووەوە. پێش 6ـی حوزەیران، لە هەرێمی کوردستان نرخی لیترێک بەنزینی نۆرماڵ لەنێوان 850 بۆ 900 دینار بوو.
29ی ئاب، کەمال محەممەد، وەزیری سامانە سرووشتییەکانی هەرێمی کوردستان بە وەکالەت لە کۆنفرانسێکی رۆژنامەڤانیدا رایگەیاند: "پێشتریش گوتوومانە 50 هەزار بەرمیل نەوتی رۆژانە بەشی بەنزینی ئێمە ناکات و هەموو کات داوای 115 هەزار بەرمیلمان کردووە. حکومەتی فیدراڵی بڕیاری داوە تەنیا 50 هەزار بەرمیل بداتە هەرێمی کوردستان، بەڵام لە هەمان بڕیاردا ئاماژە بەوەش کراوە، ئەگەر 50 هەزار بەرمیل بەشی نەکرد، 15 هەزاری دیکە وەک بەرهەمە نەوتییەکان زیاد دەکەین".
بە گوتەی وەزیری سامانە سرووشتییەکان، لە هەرێمی کوردستان 2 ملیۆن و 900 هەزار ئۆتۆمبێل تۆمار کراون، بەڵام لە 50 هەزار بەرمیل نەوتی خاو دەتوانرێ ملیۆنێک و 700 هەزار لیتر بەنزینی لێ بەرهەم بهێندرێ و بەشی ئەو ژمارەیەی ئۆتۆمبێلانە ناکات.
