رووداو دیجیتاڵ
دادگای بەرایی رەسافە لە بەغدا، بڕیاری دەستەی راگەیاندن و گەیاندنی عێراقی بە هەڵوەشاندنەوەی تاکلایەنەی گرێبەستی یەکلاکردنەوەی دارایی لەگەڵ کۆمپانیای کۆڕەک تێلیکۆم هەڵوەشاندەوە. کۆمپانیاکەش لە راگەیێندراوێکدا لەژێر ناونیشانی "دادپەروەری سەرکەوت" رایدەگەیێنێت کە بڕیار دراوە دەستبەجێ کارکردن بە گرێبەستەکەیان دەستپێبکاتەوە.
رۆژی دووشەممە، 28ـی ئەیلوولی 2026، کۆمپانیای کۆڕەک تێلیکۆم راگەیێندراوێکی لەبارەی کێشە یاساییەکانی لەگەڵ دەستەی راگەیاندن و گەیاندنی عێراق (CMC) بڵاوکردەوە بەشداربووان و رای گشتیی لە نوێترین بڕیاری دادگای بەرایی رەسافە ئاگادارکردەوە.
کۆڕەک تێلیکۆم لە بەیاننامەکەیدا دەڵێ، دوابەدوای ئەوەی لە 2-6-2026، دەستەی راگەیاندن و گەیاندنی عێراق "بە شێوەیەکی تاکلایەنە بڕیاری هەڵوەشاندنەوەی گرێبەستی یەکلاکردنەوەی دارایی (التسوية المالية)ـی نێوانیانی دا،" کۆمپانیاکە پەنای بردە بەر دادگا و لەسەر ئەو بڕیارە سکاڵای لە دژی دەستەکە تۆمار کرد.
کۆڕەک تێلیکۆم راگەیاند، ئەمڕۆ 28ـی ئەیلوول دادگای بەرایی رەسافە بڕیاری داوە بە "هەڵوەشاندنەوەی بڕیارەکەی دەستەی راگەیاندن و گەیاندنی عێراق، کارکردنەوەی دەستبەجێ بە گرێبەستی یەکلاکردنەوەی دارایی (التسوية المالية) لەنێوان هەردوولادا، کە پێشتر لە 2025/9/23 واژوو کرابوو".
کۆمپانیاکە پێشوازیی تەواوی لە بڕیارەکەی دادگای بەرایی رەسافە کردووە و رایگەیاندووە کە لە سەرەتاوە لەسەر بنەمای باوەڕبوون بە سەروەریی یاسا و رێزگرتن لە دەزگا دادوەرییەکان پەنای بردووەتە بەر دادگا، چونکە ئەوە بە تاکە "رێگای دروست بۆ یەکلاکردنەوەی کێشەکان و پاراستنی مافەکان" دەزانێت.
کۆڕەک تێلیکۆم لە بەیاننامەکەیدا سوپاسی بێپایانی بەشداربووانی خۆی کردووە بەرامبەر ئەو خۆڕاگرییەی نیشانیان داوە لە بەرامبەر ئەو هەڵمەت و فشارانەی لە ماوەی رابردوودا لەلایەن دەستەی راگەیاندن و گەیاندنەوە رووبەڕووی کۆمپانیاکە کرابووەوە. هاوکات دڵنیایی داوەتە بەکارهێنەرانی کە بە هەموو شێوازێک بەرگری لە مافەکانیان دەکات و تەواوی رێکارە یاساییەکان دەگرێتەبەر بۆ ئەوەی جارێکی دیکە دووچاری ئەم جۆرە ئاستەنگ و گرفتانە نەبنەوە.
لە کۆتایی بەیاننامەکەدا، کۆمپانیای کۆڕەک تێلیکۆم هیوا دەخوازێت دەستەی راگەیاندن و گەیاندنی عێراق لاپەڕەیەکی نوێ و دوور لە ناکۆکی بکاتەوە و بەبێ دروستکردنی ئاستەنگ و کۆسپی یەک لەدوای یەک، پێکەوە کار بۆ ئامانجە هاوبەشەکانیان بکەن؛ بە جۆرێک کە ئامانجەکە خزمەتکردنی بەشداربووان و گەشەپێدانی کەرتی پەیوەندییەکان بێت لەسەر بنەمای رێزگرتن لە دەقەکانی یاسا و بڕیارەکانی دادگا، هاوکات دوورکەوتنەوە لە رێوشوێنی ستەمکارانە کە لە بەرژەوەندیی گشتیدا نییە.
دەستەی گەیاندنی عێراق رایگەیاندووە، کۆتایی ئەم مانگە هەموو ئامێرەکانی کۆڕەک تێلیکۆم دەکوژێننەوە و کارکردنی کۆمپانیاکە رادەگرن و داوایان کردووە هاوبەشانی کۆڕەک سیمکارتەکانیان بگۆڕن. 18ـی ئەم مانگە، ئانۆ جەوهەر، وەزیری گواستنەوە بە رووداوی گوت: "دەستەی گەیاندنی عێراق ناتوانێت لە کوردستان کۆڕەک بکوژێنێتەوە، ئێمەش نامانەوێت بگات بەوە، ئەمە بابەتێکی یاساییە و کۆمپانیایەکی کوردستانییە و بە بڕیاری حکومەتی هەرێمی کوردستان و وەزارەتی گواستنەوە و گەیاندن کار دەکەن و کەسیش ناتوانێت کۆمپانیایەکی کوردستان بکوژێنێتەوە بەبێ گەڕانەوە بۆ حکومەتی هەرێمی کوردستان؛ ئێمە سیستمێکی فیدراڵیمان هەیە نەوەکو دیکتاتۆری".
دەقی راگەیێندراوەکە:
