رووداو دیجیتاڵ
بۆ سێیەم هەفتە لەسەریەک، خانەنشینانی کەرتی گواستنەوە و گەیاندن (موخابەرات) لە هەردوو پارێزگای سنە و کرماشان لە رۆژهەڵاتی کوردستان گردبوونەوە و ناڕەزایەتییان دژی خراپیی دۆخی بژێوی و پشتگوێخستنی داواکارییەکانیان دەربڕی.
ئەمڕۆ دووشەممە، 28ـی ئەیلوولی 2026، خانەنشینانی کەرتی پەیوەندییەکان لە بەردەم فەرمانگەکانی موخابەرات لە شارەکانی سنە و کرماشان دەستیان بە خۆپێشاندان کرد؛ ئەوان داوا دەکەن بەپێی رێژەی هەڵاوسان مووچەکانیان هاوتا و زیاد بکرێت، بیمەی تەندروستی و کێشەی خزمەتگوزارییە پزیشکییەکانیان بۆ چارەسەر بکرێت.
بەشداربووانی گردبوونەوەکە بە گوتنەوەی درووشمی "بەڵێن و پەیمان بەسە، سفرەمان خاڵییە!" تووڕەیی خۆیان لە کەمتەرخەمیی بەرپرسانی حکومەت و جێبەجێنەکردنی بەڵێنەکان پێشاندا و جەختیان کردەوە، تاوەکو داواکارییە سەرەتایی و مافە یاساییەکانیان دابین نەکرێت، لە شەقام ناکشێنەوە.
هاوکات لەگەڵ شارەکانی رۆژهەڵاتی کوردستان، لە چەندین شاری دیکەی ئێرانیش، خانەنشینانی کەرتە جیاوازەکان بەهۆی قەیرانی ئابووری، کەمیی مووچە و دانەبەزینی گرانیی بازاڕ، گردبوونەوەی ناڕەزایەتیی هاوشێوەیان کرد.
