رووداو دیجیتاڵ سەرۆکی پەرلەمانی کوردستان لە کۆبوونەوەیەکدا لەگەڵ کۆنسووڵ و نوێنەرانی وڵاتان رایگەیاند، کاراکردنەوەی پەرلەمان هەنگاوێکی پێویست بووە بۆ پاراستنی قەوارەی دەستووریی هەرێمی کوردستان و دژی هیچ هێز و لایەنێکی سیاسی نییە. ئاماژەی بەوەش کرد، دوو ساڵ دواکەوتنی ئەم پرۆسەیە "مەترسی لەسەر مانەوەی قەوارەی هەرێمی کوردستان دروستکردبوو." بەگوێرەی راگەیێندراوێکی پەرلەمانی کوردستان، رۆژی پێنجشەممە، 5ـی تشرینی دووەمی 2026، لە دەستپێشخەرییەکی دیپلۆماسیدا، د. ڤاڵا فەرید، سەرۆکی پەرلەمانی کوردستان بە ئامادەبوونی رامی نووری، جێگری سەرۆک و مونا قەهوەچی، سکرتێری پەرلەمان، پێشوازییان لە کونسوڵ و نوێنەرانی وڵاتان لە هەرێمی کوردستان کرد. لە کۆبوونەوەکەدا، دەستەی سەرۆکایەتیی پەرلەمان پرسی کاراکردنەوەی پەرلەمان و پاراستنی قەوارەی دەستووری و شەرعیی هەرێمی کوردستانیان لەگەڵ نوێنەرانی وڵاتان تاوتوێ کرد. "کاراکردنەوەی پەرلەمان لە بەرژەوەندیی هەموواندایە" د. ڤاڵا فەرید جەختی لە گرنگیی کاراکردنەوەی پەرلەمان کردەوە بەگوێرەی ماددەکانی (46، 47، 48) لە یاسای ژمارە (1)ـی ساڵی 1992 و پەیڕەوی ناوخۆ و رایگەیاند: "دوو ساڵ دواکەوتن لەسەر کاراکردنەوەی پەرلەمان، کاریگەریی نەرێنی نەک تەنیا لەسەر پرۆسەی یاسایی دروستکردبوو، بەڵکو مەترسی بوو لەسەر مانەوە و پاراستنی قەوارەی هەرێمی کوردستان." سەرۆکی پەرلەمان داوای لە سەرجەم فراکسیۆنەکان کرد بگەڕێنەوە هۆڵی پەرلەمان بۆ جێبەجێکردنی ئەرکەکانیان لە یاسادانان و چاودێریکردندا، هاوکات دڵنیاییشی دا کە: "کاراکردنەوەی پەرلەمان دژی هیچ هێز و لایەنێکی سیاسی نییە، بەڵکو لە بەرژەوەندیی هەموو لایەن و پێکهاتەکاندایە." لای خۆیانەوە، رامی نووری، جێگری سەرۆکی پەرلەمان و مونا قەهوەچی، سکرتێری پەرلەمان، پشتیوانیی خۆیان بۆ گوتەکانی سەرۆکی پەرلەمان دەربڕی و هەنگاوەکەیان بە "گرنگ" ناوبرد بۆ دەستەبەرکردنی مافی سەرجەم پێکهاتە، ئایین و ئایینزاکانی هەرێمی کوردستان. کۆنسووڵەکان دەستخۆشی لە هەنگاوەکە دەکەن بەپێی راگەیێندراوەکەی پەرلەمان، لە بەرامبەردا کونسوڵ و نوێنەرانی وڵاتان دەستخۆشییان لە هەنگاوی کاراکردنەوەی پەرلەمانی کوردستان کردووە بۆ پێشخستنی پرۆسەی دیموکراسی لە هەرێمی کوردستان و هیوایان خواستووە لە داهاتوودا پەیوەندییەکانیان لەگەڵ پەرلەمان پتەوتر بکەن.
کوردستان05-11-2026سکرتێری پەرلەمانی کوردستان: چاوەڕێی وەڵامی فراکسیۆنەکانین بۆ پێکهێنانی لیژنە هەمیشەییەکان
