خەڵکی قامشلۆ هێرشەکانی ئێران بۆ سەر هەرێمی کوردستان سەرکۆنە دەکەن

لە کاردانەوەی شەهیدبوونی شەش پێشمەرگە لە ئەنجامی هێرشەکانی ئێران، نارین موراد، کە فەرمانبەرە لە قامشلۆ، دەڵێت: سەرەتا سەرەخۆشی لە بنەماڵەی پێشمەرگەکان دەکەین. جێگەی شەرمەزارکردنە کە هێرشەکان بۆ سەر ناوچەکە بەردەوامن؛ ئەم هێرشانە لە بەرژەوەندیی ناوچەکەدا نین، چونکە هەرێم رۆڵێکی گرنگی لە ئاشتی و سەقامگیریی ناوچەکەدا هەیە. ئێران بە هەموو توانایەکییەوە ناوچەکە بەرەو جەنگ دەبات، ئەمە پەیامێکە بۆ ئەمریکییەکان چونکە بنکەکانیان لەوێیە، بەڵام لەگەڵ ئەوەشدا هێرشەکان بەردەوامن. پێویستە حکومەتی عێراق ئەرکی خۆی جێبەجێ بکات و بە بەرپرسیارێتییەوە سەیری ئەم پرسە بکات."

بەشیر دەروێش، کە هاووڵاتییەکی خانەنشینە، بۆچوونی وایە هێرشێکی دڕندانەیە بۆ سەر کورد و دژی کوردە ئامانجی ئەوان کوردە دەشپرسێت: "دەنا مەبەستیان چییە؟ باشوور چ پەیوەندییەکی بە شەڕی ئەوانەوە هەیە؟"

هاوکات عیسا قامشلۆ، کە کرێکارە، لە لێدوانەکەیدا رایگەیاند: "ئەم هێرشەی سوپای ئێران بۆ سەر باشووری کوردستان و شەهیدبوونی 6 پێشمەرگەمان سەرکۆنە دەکەین؛ هیوادارین گەلی کورد یەکدەست و یەکگرتوو بن".

لە کاتێکدا شەڕی نێوان ئەمریکا و ئێران بەردەوامە، هێرش دەکرێتە سەر هەرێمی کوردستان، ئەمەش لە کاتێکدایە کە خەڵکی ناوچەکە دەڵێن کوردەکان هیچ پەیوەندییەکیان بە باشە و خراپەی ئەم شەڕەوە نییە.

عەباس عەباس، چالاکڤانی مەدەنییە، جەخت دەکاتەوە: "زۆر وڵات هەن بەدوای بیانوودا دەگەڕێن بۆ ئەوەی لە کوردستان بدەن. ئەم هێرشانە و شەهیدبوونی 6 کەس قبوڵکراو نییە. پێشمەرگە هێزێکی پاراستنە، هێرشکردنە سەر ئەوان، هێرشکردنە سەر هەموو کوردستانە."

بەشێک لە هاووڵاتییانیش هەست بە بێئومێدی و ستەمێکی گەورە دەکەن بەرامبەر بە نەتەوەکەیان. ئەمین حەج عەلی خانەنشین بە رووداوی گوت: "تەواوی جیهان دوژمنی کوردن، نازانین چی بکەین، خودا حەقمان بکاتەوە؛ نازانین چیمان کردووە وا لە ئێمە دەکەن". هەروەها فاتیمە مفرح، کە خانمێکی ماڵەوەیە، نیگەرانیی خۆی دەردەبڕێت و دەڵێت: باشوور چییە کە لێی دەدەن؟ وەڵا هەڵەن، بەس هەر لە کورد دەدەن، دەچن و دێن هەر لە کورد دەدەن".

لەلایەکی دیکەوە، فەرماندەی گشتیی هێزەکانی سووریای دیموکرات (هەسەدە) هاوخەمیی خۆی بۆ شەهیدبوونی ئەو شەش پێشمەرگەیە دەربڕی و سەرەخۆشیی ئاراستەی بنەماڵەکانیان کرد.