رووداو دیجیتاڵ
بەڕێوەبەرایەتیی گشتیی کەشناسی و بوومەلەرزەزانیی هەرێمی کوردستان پێشبینی دەکات پلەی گەرما جێگیر بێت و لە هەندێک ناوچەش ئەگەری تۆز و خۆڵێکی سووک هەبێت.
بەگوێرەی پێشبینییەکانی کەشناسی، ئەمڕۆ پێنجشەممە 13ـی ئابی 2026، ئاسمانی هەرێمی کوردستان بە گشتی لەنێوان ساماڵ و پەڵەهەور دەبێت، لە هەندێک لە ناوچە شاخاوییەکانیش ئاسمان دەبێتە نیمچەهەور. پلەی گەرما بە گشتی نزیک دەبنەوە لە تۆمارەکانی دوێنێ، تەنیا لە ناوچە سنوورییەکانی رۆژهەڵات نەبێت کە کەمێک بەرز دەبنەوە.
ئاسۆ کەمال، شارەزای کەشناسی و بەڕێوەبەری پێشووی کەشناسیی سلێمانی بە تۆڕی میدیایی رووداوی راگەیاند: "پێشبینی دەکرێت سبەی خۆڵبارینێکی سووک ناوچەکانی عێراق و بەشێکی کوردستانیش بگرێتەوە، بەتایبەتی ناوچەکانی رۆژئاوای کوردستان، بەڵام رێژەکەی زۆر کەم دەبێت."
ئەو شارەزایەی کەشناسی باسی لە دابەزینی پلەی گەرمای کرد و گوتی: "ناوەڕاستی هەفتەی داهاتوو پلەی گەرما زیاتر روو لە نزمی دەکەن."
سەبارەت بە کەشی سبەی هەینی، 14ـی ئابی 2026، کەشناسیی هەرێمی کوردستان ئاماژەی بەوە کردووە، کە ئاسمان ساماڵ و پەڵەهەور دەبێت، لەگەڵ ئەگەری بەرزبوونەوەی تۆز و خۆڵێکی سووک. بەهۆی ئەو تۆز و خۆڵەشەوە، مەودای بینین لەنێوان شەش بۆ هەشت کیلۆمەتردا دەبێت.
بەرزترین پلەکانی گەرمای پێشبینیکراو بۆ سبەی
هەولێر: 42 پلەی سیلیزی
پیرمام: 39 پلەی سیلیزی
سلێمانی: 40 پلەی سیلیزی
هەڵەبجە: 43 پلەی سیلیزی
چەمچەماڵ: 42 پلەی سیلیزی
دهۆک: 42 پلەی سیلیزی
زاخۆ: 42 پلەی سیلیزی
ئاکرێ: 42 پلەی سیلیزی
گەرمیان: 47 پلەی سیلیزی
حاجی ئۆمەران: 33 پلەی سیلیزی
