رووداو دیجیتاڵ
بۆ یەکەمجار لەسەر ئاستی هەرێمی کوردستان و عێراق، لە دروستکردنی رێگەی دەربەندیخان - وارماوا تەکنەلۆژیایەکی نوێی ئەندازیاری بەکاردەهێنرێت؛ بەڕێوەبەری رێگاوبانی گەرمیان دەڵێت، ئەو جۆرە کۆنکریتەی لە رێگەکەدا بەکاری دەهێنن بەرگەی گوشاری زۆر و کەشوهەوای سارد دەگرێت.
ئەندازیار عەدنان خەلیل، بەڕێوەبەری رێگاوبانی گەرمیان لە کاتی بەشداریکردنی لە بەرنامەی (مژار)ی رادیۆی رووداو، رایگەیاند: "لە پڕۆژەی دروستکردنی رێگەی دەربەندیخان تاوەکو وارماوا کە درێژییەکەی زیاتر لە 15 کیلۆمەترە، تەکنەلۆژیای کۆنکریتی وشک (RCCP) بەکاردەهێنرێت. ئەم تەکنەلۆژیایە تاوەکو ئێستا لە هەرێمی کوردستان و عێراق بەکارنەهاتووە."
سەبارەت بە تایبەتمەندیی ئەو تەکنەلۆژیایە، عەدنان خەلیل گوتی، کۆنکریتەکە لە کارگە دروست دەکرێت و بە فاریشە رادەخرێت و راستەوخۆ دەکوترێتەوە، پاشان چینێکی تایبەتی بەسەردا دەدرێت بۆ ئەوەی درز نەبات و لە قۆناخی کۆتاییشدا رووی رێگاکە قیڕ دەکرێت.
بەڕێوەبەری رێگاوبانی گەرمیان ئاماژەی بەوە کرد، زیاتر لە 26%ی کارەکان تەواو بوون و ئێستا نزیکەی دوو کیلۆمەتری رێگاکە ئامادەیە بۆ راخستنی چینە کۆنکریتەکە.
عەدنان خەلیل باسی لە پڕۆژەکانی دیکەی سنوورەکەش کرد و رایگەیاند، سەرەڕای قەیرانی دارایی، لە ماوەی ساڵێک و نیوی رابردوودا توانراوە 32 پڕۆژەی رێگاوبان بە درێژیی 90 کیلۆمەتر و بە گوژمەی 16 ملیار دینار تەواو بکرێن، کە زۆربەیان رێگەی گوندەکان و ناوچە سنوورییەکان بوون.
سەبارەت بە دووسایدکردنی رێگەی نێوان خاڵی سنووریی پەروێزخان و کەلار، عەدنان خەلیل رایگەیاند لە ساڵی 2014وە بەردەوام دەرخستە بۆ دووسایدکردنی ئەو رێگەیە ئاراستەی حکومەت دەکەن، چونکە "شادەماری بازرگانیی نێوان هەرێمی کوردستان و ئێرانە"، بەڵام جێبەجێکردنی پڕۆژەکە پەیوەستە بە تەرخانکردنی بودجە و نەختینەی پێویست.
